政是政非 ﹕美國總統大選又關香港事？

美國總統大選進入尾聲，過多兩日就會揭盅，兩位老人家究竟邊個會贏，鬥到依一刻都未有端倪！其實，喺香港人嚟講，依場選舉就好似睇肥皂劇咁，愈睇愈上癮，欲罷不能！老實講，理得佢邊個選到吖，有啲見地嘅人都知道，以美國咁成熟嘅政治操作，無論邊個當選，美國嘅外交政策根本唔會變，香港以後條路，一樣咁難行；只不過拜登可能冇阿侵侵咁癲嘅啫！嗱，我係話可能，因為以拜登嘅往績，佢嘅行為舉措比較正常，所以有咁嘅判斷，但如果佢當選之後，會唔會仲癲過侵侵呢？政客其實好現實，只要利益所在，話咁快就變臉，真係好難估㗎！

美國離香港冇雷公咁遠，勢估唔到有人連美國總統選舉都要玩埋一份！早輪喺網上盛傳嘅一份報告，話拜登個乖仔喺內地做生意，涉嫌用拜登個朶收受利益。但最近美國傳媒就踢爆，原來成份報告都係假嘢，聲稱出報告嘅機構澄清從未做過一份咁嘅報告，報告中嘅署名分析員根本冇其人，而成個報告內容都係有人收咗一萬蚊美金揑造出嚟嘅！咁，邊個俾錢呢？最吊詭嘅係，依個竟然係同香港好有關係嘅人物-某位傳媒大亨嘅私人助理。

美國傳媒真係唔客氣㗎，既然嗰位仁兄係傳媒大亨私人助理，梗係開埋傳媒機構個名啦，直情話係個傳媒機構有份參與添！搞到阿大亨匆匆發聲明話自己唔知情，又話唔關個傳媒機構事喎！而依位私人助理又立即宣布辭職，仲攬哂上身，話係自把自為，唔關老板事喎！之但係，美國傳媒證據確鑿，阿助理俾人作嘢嗰一萬蚊美金酬勞，係大亨間私人公司嘅支票，點解呢？唔通又一個羅生門？嗱，若果大亨真係唔知情，咁依個助理就好大膽喇，瞞住老細做啲咁嘅衰嘢，又用老細間私人公司出支票，大拿拿成萬蚊美金都唔問過老細！累到大亨依趟局住啞仔食黃蓮，真係冇陰功啦！

香港人好鬼可愛，唔少人對拜登乖仔依單流料信到足，有啲侵侵支持者更加幸災樂禍咁覺得，「拜登今次大鑊了！」不過，唔係事後孔明，其實由流料傳出之初，明眼人就知可信性唔高。點解？好簡單，如果係真嘢，早就俾侵侵用嚟攻擊拜登啦，但係侵侵喺3次辯論中隻字不提，而美國傳媒又低調處理，咁就9成係流料喇！其實，政治好黑暗，用黑材料打擊對手一啲都唔奇，但依單嘢最令人想唔透嘅，係製造黑材料嘅人喺成件事之中，究竟可以得到啲乜嘢呢？侵侵嬴，真係有咁大利益係關香港事嘅咩？令人費解！

資深媒體人

瑋公子