政是政非 ﹕美国总统大选又关香港事？

美国总统大选进入尾声，过多两日就会揭盅，两位老人家究竟边个会赢，斗到依一刻都未有端倪！其实，喺香港人嚟讲，依场选举就好似睇肥皂剧咁，愈睇愈上瘾，欲罢不能！老实讲，理得佢边个选到吖，有啲见地嘅人都知道，以美国咁成熟嘅政治操作，无论边个当选，美国嘅外交政策根本唔会变，香港以后条路，一样咁难行；只不过拜登可能冇阿侵侵咁癫嘅啫！嗱，我系话可能，因为以拜登嘅往绩，佢嘅行为举措比较正常，所以有咁嘅判断，但如果佢当选之后，会唔会仲癫过侵侵呢？政客其实好现实，只要利益所在，话咁快就变脸，真系好难估㗎！

美国离香港冇雷公咁远，势估唔到有人连美国总统选举都要玩埋一份！早轮喺网上盛传嘅一份报告，话拜登个乖仔喺内地做生意，涉嫌用拜登个朶收受利益。但最近美国传媒就踢爆，原来成份报告都系假嘢，声称出报告嘅机构澄清从未做过一份咁嘅报告，报告中嘅署名分析员根本冇其人，而成个报告内容都系有人收咗一万蚊美金揑造出嚟嘅！咁，边个俾钱呢？最吊诡嘅系，依个竟然系同香港好有关系嘅人物-某位传媒大亨嘅私人助理。

美国传媒真系唔客气㗎，既然𠮶位仁兄系传媒大亨私人助理，梗系开埋传媒机构个名啦，直情话系个传媒机构有份参与添！搞到阿大亨匆匆发声明话自己唔知情，又话唔关个传媒机构事㖞！而依位私人助理又立即宣布辞职，仲揽哂上身，话系自把自为，唔关老板事㖞！之但系，美国传媒证据确凿，阿助理俾人作嘢𠮶一万蚊美金酬劳，系大亨间私人公司嘅支票，点解呢？唔通又一个罗生门？嗱，若果大亨真系唔知情，咁依个助理就好大胆喇，瞒住老细做啲咁嘅衰嘢，又用老细间私人公司出支票，大拿拿成万蚊美金都唔问过老细！累到大亨依趟局住哑仔食黄莲，真系冇阴功啦！

香港人好鬼可爱，唔少人对拜登乖仔依单流料信到足，有啲侵侵支持者更加幸灾乐祸咁觉得，“拜登今次大镬了！”不过，唔系事后孔明，其实由流料传出之初，明眼人就知可信性唔高。点解？好简单，如果系真嘢，早就俾侵侵用嚟攻击拜登啦，但系侵侵喺3次辩论中只字不提，而美国传媒又低调处理，咁就9成系流料喇！其实，政治好黑暗，用黑材料打击对手一啲都唔奇，但依单嘢最令人想唔透嘅，系制造黑材料嘅人喺成件事之中，究竟可以得到啲乜嘢呢？侵侵嬴，真系有咁大利益系关香港事嘅咩？令人费解！

资深媒体人

玮公子