政是政非 ﹕中央出辣手，泛民議員去勢

人大常委開會，決議DQ宣揚或者支持港獨主張，拒絕承認國家對香港擁有並行使主權、尋求外國或境外勢力干預香港特別行政區事務，或者具有其他危害國家安全等行為，不符合擁護中華人民共和國香港特別行政區的法定要求和條件，而喺第七屆立法會選舉提名期間被裁定提名無效嘅立法會議員。政府隨即發稿宣布有4個泛民議員即時被DQ。

中央咁嘅決定，當然係引起政圈議論紛紛啦！廿幾個泛民議員其實喺今個星期初，有消息預先流出之時已經開咗個緊急會議，商量對策。結果，傾咗幾個鐘頭，達成咗個共識，就係如果嗰4個被點名議員真係被DQ，佢哋一於集體總辭喎！據聞喺傾嘅過程中都好有火花㗎，最後先至傾咗依個結論出嚟！嗱今日中央宣布咗喇，睇吓泛民點接招嘞！

一次過DQ4個議員，泛民梗係唔順啦㗎嘞，但係唔少人就拍哂手掌喎！喂，正所謂：「出得嚟行，預咗要還！」當日佢哋嘅所作所為有目共睹，佢哋做得出就預咗有後果啦！今日要去承受，亦都係理所當然，唔到你唔順氣㗎噃！如果真係有唔憤氣，只能同佢哋講句：早知今日，何必當初喇！

話時話，依班泛民議員今舖真係進退失據，玩政治遊戲嘅道行有如小學雞！查實如果要總辭，點解唔喺一個月前，立法會未展開新會期之前呢？嗰時班友仔又搞民調，又搞公投，鬼咁肉酸?到留任！搏乜呢？唔通真係搏吓阿爺條藤條唔會霍落嚟，俾佢哋偷到雞，坐享薪優糧準，仲喺度作威作福咩？好嘞，?到留喺立法會就正正經經做番啲好事啦，結果，仍然係搞破壞，拉布，自己大部人唔去開會，但係就猛點人數，阻住會議議程。喂，出成十幾廿萬人工一個月，咁様玩，咪好著數？廣大市民看在眼裏，大家明啦，唔駛講嘢！

依班泛民議員呢趟真係自討沒趣，搞政治冇陣勢，冇策略，更加冇風骨！智慧同能力，若果同上一輩泛民政客嚟比，真係爭咗九條街！華叔在天之靈，見到咁嘅場面，真係喊得一句句囉！真係㗎，開講有話：知己知彼百戰百勝。泛民既不知己有幾多斤兩，連自己個定位都左搖右擺；既想拉攏攬炒派，又怕失咗温和派支持，結果係左顧右盼，前仆後繼，潰不成軍！佢哋更加輕視阿爺，以為拉住美國佬衫尾，就有人照起！唉，咁嘅智商，真係有如一位前領導人話齋：「Too simple , sometimes naive! 」喇！

資深媒體人

瑋公子