政是政非 ﹕立法会回归庄严理性议事堂

立法会4个泛民议员被DQ之后，另外15个同声同气嘅“兄弟姊妹”就集体辞职，立法会里面嘅泛民就剩番两丁友。未来几个月，睇嚟都唔会再规程问题呀、无啦啦点人数呀，休会待续呀依啲拉布行为。希望议员可以认认真真专心审议议案，批核预算，做多一啲有利民生嘅事。

不过，留返喺议会嘅议员系咪咁谂呢？仍系一个疑问！事关上个星期，食福局个局长去议会报告疫情嘅时候，俾班议员质到口窒窒，连面都青埋。议员𠮶个凶狠程度，比起以前嘅反对派有过之而无不及！一时之间，真系以为佢哋返咗嚟添！冇错，议员嘅责任系监管政府，官员亦需要向议员说明政策同埋工作细节。过去当局好多政策同埋处理的确好戆居，搞到好扰民又达唔到效果。疫症而家去到第四波嘞，香港仲系搞唔掂，不明个案几乎日日都有！大佬呀，香港无办法清零，就通关冇期，影响民生极大，经济亦顶唔住㗎喇，当局点解唔可以彻底啲大刀阔斧咁做好啲呢？又难怪啲议员咁炆憎、咁劳气嘅！不过，炆憎还炆憎，质询都可以态度好啲嘅，人哋都尽心尽力去做咯，有不足嘅，有唔够完善嘅，咪提出嚟要求改善囉！见到呀局长诚惶诚恐𠮶个样，真系戥佢难过！

议事堂内系要有反对声音，冇咗反对派对着干，官员自不然就变咗系target ！但系都要奉劝一下班立法会议员，千祈唔好谂埋一边，将以前反对派𠮶套攞嚟用，突显自己唔系“唯是派”，唔系举手机器。其实，质询都可以用一种好优雅的方式，唔一定要青筋暴现咬牙切齿嘅！立法会可以回到正轨，也希望可以是一个庄严互敬，理性议政的议事堂。

资深媒体人

玮公子