政是政非 ﹕大灣區將成本港大學生最佳出路

行政長官林鄭月娥任內第4份施政報告足足有200幾項新措施，尋日喺立法會宣讀咗兩個鐘頭，讀到佢聲都沙埋，真係辛苦佢喇！依份報告，比起上一份，涵蓋範疇多幾倍，而最珍貴嘅係見到特首團火返咗嚟，真係有心再發圍，為香港嘅未來做多一啲實事！

依份報告開始，雖然用咗唔少篇幅講國安法，但成份報告嘅重點始終係香港嘅民生同埋未來發展目標，包括大家最關心嘅經濟、交通、土地房屋，同埋最近嘅好熱門嘅話題：「協助香港青年去大灣區發展」。施政報告喺依個工作上，提出咗相當具體而且好有吸引力嘅方案，其中一項係「大灣區青年就業計畫」，由勞工及福利局牽頭跨部門籌備，開設2000個職位助本港大學畢業生，去大灣區城市工作，職位種類包括企業、科技、金融業等，而當局將提供補助，令參加計畫者最高可獲每月高達兩萬多元工資。同時，當局又預留咗1億元推出「粵港澳大灣區青年創業資助計劃」，資助約200間青年初創企業。

睇吓，今時今日嘅後生仔幾咁幸福，有人鋪埋路，俾埋錢佢地去闖天下創事業。同我哋後生嗰陣，靠自己喺個好似毒龍潭嘅社會裡面搏命，真係唔恨得咁多嘞！大灣區發展規劃係國家政策，能夠爭取融入成為參與嘅一份子，必定大有作為。而家政府鋪埋條路俾香港大學生，如果醒目嘅就咪失良機喇！

講返份施政報告，因為內容巨細無遺，有人就揶揄佢太過瑣碎，乜都炒埋一碟，好似炒雜碎咁！之但係今時今日香港市民所關心嘅，又真係依啲咁貼地嘅民生問題喎！所以，特首千祈唔好介懷依啲是是非非，為阿公做嘢，點做都有人批評㗎喇，只要問心無愧，總有人理解你嘅用心良苦同埋誠意嘅，一齊為香港加油啦！

資深媒體人

瑋公子