政是政非 ﹕大湾区将成本港大学生最佳出路

行政长官林郑月娥任内第4份施政报告足足有200几项新措施，寻日喺立法会宣读咗两个钟头，读到佢声都沙埋，真系辛苦佢喇！依份报告，比起上一份，涵盖范畴多几倍，而最珍贵嘅系见到特首团火返咗嚟，真系有心再发围，为香港嘅未来做多一啲实事！

依份报告开始，虽然用咗唔少篇幅讲国安法，但成份报告嘅重点始终系香港嘅民生同埋未来发展目标，包括大家最关心嘅经济、交通、土地房屋，同埋最近嘅好热门嘅话题：“协助香港青年去大湾区发展”。施政报告喺依个工作上，提出咗相当具体而且好有吸引力嘅方案，其中一项系“大湾区青年就业计画”，由劳工及福利局牵头跨部门筹备，开设2000个职位助本港大学毕业生，去大湾区城市工作，职位种类包括企业、科技、金融业等，而当局将提供补助，令参加计画者最高可获每月高达两万多元工资。同时，当局又预留咗1亿元推出“粤港澳大湾区青年创业资助计划”，资助约200间青年初创企业。

睇吓，今时今日嘅后生仔几咁幸福，有人铺埋路，俾埋钱佢地去闯天下创事业。同我哋后生𠮶阵，靠自己喺个好似毒龙潭嘅社会里面搏命，真系唔恨得咁多嘞！大湾区发展规划系国家政策，能够争取融入成为参与嘅一份子，必定大有作为。而家政府铺埋条路俾香港大学生，如果醒目嘅就咪失良机喇！

讲返份施政报告，因为内容巨细无遗，有人就揶揄佢太过琐碎，乜都炒埋一碟，好似炒杂碎咁！之但系今时今日香港市民所关心嘅，又真系依啲咁贴地嘅民生问题㖞！所以，特首千祈唔好介怀依啲是是非非，为阿公做嘢，点做都有人批评㗎喇，只要问心无愧，总有人理解你嘅用心良苦同埋诚意嘅，一齐为香港加油啦！

资深媒体人

玮公子