政是政非﹕ 莫再埋怨 抗疫要齊心

過去一個星期，本港嘅新型肺炎確診幾乎日日過百，睇嚟依個第四波真係好難搞！當局急急宣布又再收緊防疫措施，限制人群聚集，杜絕擴散，本來係必需嘅，但係喺民眾嚟講，依啲措施時緊時鬆，但搞極都無辦法斷尾，而家連冬至咁大嘅節日，都唔可以一家人開開心心出去食餐飯，難免怨聲四起！究竟咁樣落去，我哋幾時先可以收科呢？

老實講，相信冇人可以預計依個疫症幾時會完！好多人批評當局嘅防疫抗疫做到唔湯唔水，搞到今日就大家捱苦！係嘅，見到內地雷厲風行咁實施防疫抗疫措施，好快就控制咗疫情，而香港就拖拖拉拉，連最基本嘅全民檢測都做唔到，香港人確實好氣餒！但係諗深一層，香港人又可唔可以好似內地人民同政府咁配合，齊心抗疫防疫呢？政府嘅其他各個機構又能唔能夠好似內地咁，配合衞生部門全面抗疫呢？大家睇番疫情第一波嗰時，內地好熱心咁派醫療隊嚟香港，為香港人免費檢測，但係市民嗰種冷淡反應，令人心寒！又睇下個政府吖，日日淨係見到醫療同埋衞生部門喺度單打獨鬥，其他局有冇主動幫拖呢？限聚令實施咁耐，執法只係靠食環處同警察，其他部門點解唔可以幫下手呢？而家限制堂食，人人外賣，啲即棄餐具垃圾大增，清理又係靠食環，環保局點解理唔做番啲嘢幫下拖呢？

人人都識得批評，但淨係批評又唔肯合作，根本係於事無補！依一場疫症唔係講玩㗎，咪以為可以置身事外，當燒到自己就恨錯難返喇！依個世界，冇人係萬能，超級英雄咁打得，都唔係次次打贏，佢哋都要其他人幫拖，先至可以化險為夷。香港亦都一様，要抗疫成功，唔好再怨天尤人喇，一定要全民一條心，集合力量打敗疫魔啦！

資深媒體人

瑋公子