政是政非﹕ 莫再埋怨 抗疫要齐心

过去一个星期，本港嘅新型肺炎确诊几乎日日过百，睇嚟依个第四波真系好难搞！当局急急宣布又再收紧防疫措施，限制人群聚集，杜绝扩散，本来系必需嘅，但系喺民众嚟讲，依啲措施时紧时松，但搞极都无办法断尾，而家连冬至咁大嘅节日，都唔可以一家人开开心心出去食餐饭，难免怨声四起！究竟咁样落去，我哋几时先可以收科呢？

老实讲，相信冇人可以预计依个疫症几时会完！好多人批评当局嘅防疫抗疫做到唔汤唔水，搞到今日就大家挨苦！系嘅，见到内地雷厉风行咁实施防疫抗疫措施，好快就控制咗疫情，而香港就拖拖拉拉，连最基本嘅全民检测都做唔到，香港人确实好气馁！但系谂深一层，香港人又可唔可以好似内地人民同政府咁配合，齐心抗疫防疫呢？政府嘅其他各个机构又能唔能够好似内地咁，配合卫生部门全面抗疫呢？大家睇番疫情第一波𠮶时，内地好热心咁派医疗队嚟香港，为香港人免费检测，但系市民𠮶种冷淡反应，令人心寒！又睇下个政府吖，日日净系见到医疗同埋卫生部门喺度单打独斗，其他局有冇主动帮拖呢？限聚令实施咁耐，执法只系靠食环处同警察，其他部门点解唔可以帮下手呢？而家限制堂食，人人外卖，啲即弃餐具垃圾大增，清理又系靠食环，环保局点解理唔做番啲嘢帮下拖呢？

人人都识得批评，但净系批评又唔肯合作，根本系于事无补！依一场疫症唔系讲玩㗎，咪以为可以置身事外，当烧到自己就恨错难返喇！依个世界，冇人系万能，超级英雄咁打得，都唔系次次打赢，佢哋都要其他人帮拖，先至可以化险为夷。香港亦都一様，要抗疫成功，唔好再怨天尤人喇，一定要全民一条心，集合力量打败疫魔啦！

资深媒体人

玮公子