政是政非 ﹕抗疫专家都要政治正确

疫情日日系咁爆，啲不明源头个案愈来愈多，好似总会有一个喺你左近嘅感觉，真系人心惶惶㗎！香港人而家望到颈都长，就系等疫苗快啲到，快啲打，顶住先。嚟到依一个地步，可谓生死关头，其他一切已经系次要，保住条命仔至紧要。

所以，先前个政府宣布话明年1月就有第一批疫苗到港，自然就成为普罗大众嘅热门话题。喂，政府话引入3个唔同生产商嘅疫苗㖞，打边只稳阵呀？虽然政府就话市民冇得拣啫，而且人各有志，总唔会全部人拣哂一様，但系人就系咁无聊㗎啦，自己做吓民调，问吓你系咪同我一样咁谂都好呀，攞番啲数据参考吓亦无妨。于是，个个见到面，几乎都有问依个问题，而最有趣系个个嘅谂法好唔同，就算拣埋同一款都有唔同嘅理据，好鬼过瘾！

普罗大众系咁啫，德高望重嘅专家又点睇呢？哗，系咪读饱书嘅人睇嘢真系同世俗人好大分别呢，要与别不同，先至可以做专家呢？早几日，有位近排被公认系领军抗疫嘅专家，竟然劈头就答记者，话就算疫苗嚟到香港，佢唔会接种㖞！吓，唔系啩？系呀，原来佢喺大学硏发紧一种喷鼻式嘅疫苗，好快有成果喇，自己硏发嘅紧系信自己啦，所以唔会打人哋硏发嘅疫苗㖞！唉，专家呀专家，你驶唔驶咁老实呀？嗱，佢虽然冇话人哋嘅疫苗唔得，又冇叫人唔好打，但系佢老人家带队抗疫，行到咁前，人人睇佢头，信哂佢喇噃，而家个个都话争住快啲去打，佢话唔打㖞！咁即系点呀，信佢定唔信佢好呢？

有牙痕友就话，而家唔止香港，直情系举国抗疫，依位专家喺依个时候讲啲咁嘅嘢，大唱反调，唔单止“政治不正确”，仲有危害“国家安全”之嫌添！哗，咁就冇咁严重，不过，件事就可以说明，学者始终个脑袋好鬼单纯，政治敏感度又唔够，冇考虑到自己今时今日一言一语，一举一动嘅影响力，大到影响成个社会，所以真系唔好噏得就噏！

资深媒体人

玮公子