政是政非 ﹕阿爷出手 招招中要害

依几日，北方频频透过香港媒体爆料，话人大常委会开会研究，针对香港嘅政制将会大动手术，𠮶班靠住食人肉馒头上位，但又唔做嘢白出粮嘅“独派”区议员，唔单止可能被DQ，而2022年特首选举，117个区议员更加可能会被踼出局冇得做选委。消息仲话，为要立法会重回正轨，𠮶5个超级区议席都会取消埋。睇嚟，阿爷今次呢舖真系大刀阔斧，唔系讲玩喇！

有人就问，DQ咗啲议员空缺，咁唔系又要补选囉，依家疫情咁严重，点搞呀？嗱，阿爷做嘢梗系谂埋后着㗎啦，消息话，空缺一于由特区政府委任地区人士填补空缺，而依啲被委任嘅人，当然系以熟悉地区事务者为优先考虑对象啦！不过，有人又问嘞，喂，依啲被委任嘅人，冇民意基础㖞，点得呀？喂，大家唔好唔记得今年依一届区选有唔少服务咗区议会好多年嘅议员，只差些微票数落选，佢哋有哂民意授权，够哂资格被委任啦！重返议会之后，佢哋不但驾轻就熟，仲一定会更加落力为地区做实事添！

有人又问嘞，117个区议员不列为特首选委，咁个选委会规模咪愈玩愈缩？咁又唔系㖞，阿爷早已经谂埋喇，目前大约有200个港区政协委员，佢哋以往要互选51名代表进入特首选委会，而家就唔驶互选嘞，全体自动成为选委咪掂过碌蔗囉！咁，区议员嘅角色就更加清楚嘞，咪好似而家𠮶班咁不务正业又自我膨胀，一于专心做好服务地区嘅嘢就得嘞！

口痕友就话，如果上述嚟自北方消息属实，香港嘅民主系咪倒退呢？咁就见仁见智喇，事关俾你香港自己去搞又搞出个大头佛，仲烦到阿爷添，而家要阿爷出手，梗系招招中要害啦！

资深媒体人

玮公子