政是政非 ﹕阿爷做嘢点会俾你估到

啱啱过咗嘅礼拜六，人大未如所料，将本港改革区议会嘅内容放入明年3月常委会议程上，搞到有啲人好失望，但亦有人暗暗叫喜，心谂，唔通阿爷遇到阻力，有所顾忌唔敢做？如果系咁，班揽炒派区议员睇嚟又有生机囉㖞！

究竟系咪咁呢？嗱，首先，阿爷今时今日喺香港做嘢，已经冇乜需要顾忌，亦冇乜嘢系唔敢做。政圈有句话充满玄机：政治一日都嫌长。即系话，诡异嘅政治唔系咁易睇得通，而且变量好大，你愈以为理所当然的事，往往就出人意表。好似依次咁，政圈传到咁行，连班搞搞震嘅揽炒派都打定输数，出哂口术要“变阵”应战咯，点知竟然冇嘢发生㖞，吹胀咩！

梗系啦，阿爷谂嘅嘢，布嘅局咁易俾人睇穿咩！有啲嘢其实估估下，出嚟嘅效果仲好啲添。据有个高人讲，改革区议会依单嘢，阿爷势在必行㗎喇，方案摆咗喺度，随时交人大常委讨论。之不过，而家距离明年3月仲流流长，驶乜咁快公布内容，俾班友仔说三道四呢？而且政治形势日日唔同，有好多细节仲可以慢慢深化，又何必急𠮶一时，咁快话讲哂出嚟呢？

既然系咁，点解先前又漏咗啲消息出嚟呢？嗱，依啲就系政治嘅艺术嘞，大家记得英国佬管治香港殖民地时期常用嘅“放政治气球”技俩嘛？一啲重大政策决定之前，港英政府会先透过一啲特定嘅“可靠消息人士”透过媒体放下风，睇吓社会反应，经过调整之后先至推出。究竟依一次系咪阿爷“放气球”？咁大家自己估吓嘞！

系嘞，啱啱提到揽炒派，佢哋最近大大声话要搞个“香港公民议政平台”，真系得啖笑！唔知系咪收到风阿爷要郁佢哋，就嚟冇区议员做嘞，就快快脆脆搞个平台做据点，以为咁样可以挑战阿爷底线！唉，莫讲同阿爷玩嘢，根本未够班啦，佢哋身为区议员，成立一个咁嘅组织，系犯法㗎，仲大锣大鼓咁宣扬，随时拉得啦，简直白痴兼低能！你哋话啦，香港政治发展，将来由依班二打六嚟搞，前途会点？冇眼睇囉！

资深媒体人

玮公子