政是政非 ﹕应该表扬前线人员无私抗疫

元旦假期连周末有3日，往常日子香港人最爱趁机去短途旅行，静静地叹番几日。但系今次遇上个死唔断气嘅疫症，周围封哂关，真系郁不得其正，认真冇瘾！之不过，点都好过一班仍然为抗疫防疫苦战嘅人员，佢哋连放假都牺牲，仲要面对随时染疾嘅风险，依种奉献社会嘅精神，值得表扬！

依几日，本港嘅确诊感染数字回落到40-50宗，算系一个好消息。至少人人有机会望见家乡，相比最近又爆到七彩嘅英美同埋欧洲，香港人系应该有啲安慰嘞！当然，依样嘢真系同人民素质好大关系，香港人自爱自重，人人肯戴口罩，大部分愿意牺牲一些社交活动，肯改变生活模式配合政府防疫政策，所以防疫抗疫终于见到成绩，事实上，香港人真系应该自豪嘅！

但系，我哋亦都唔好抹煞政府抗疫人员嘅功劳。虽然抗疫初期，当局有啲离地，又有啲反应迟钝；而喺推动政策嘅时候，事前对民情嘅了解未够透彻，但系大部分嘅香港人都唔会质疑政府防疫抗疫嘅决心，尤其当疫情进入第四波之后，当局一再收紧防疫措施，控制疫情嘅效果就更加明显嘞！嗱，个社会其实好公道㗎，政府做得唔够好，梗系批评佢啦，但系班前线人员夜以继日，日以继夜咁为市民抗疫防疫点会睇唔到呀！

喂，大佬呀，放元旦假期之前，有40几栋大厦居民要做强制检测㖞，真系听见都知系一件艰巨工作啦！但系前线嘅抗疫人员义不容辞就扛起任务，而更加难得嘅系民政局、社署、警方依啲支援部门二话不说全面配合，短短几日有序完成，令人鼓舞。特别想提下，香港公务员既有才能干劲、又有台型，向来喺国际被公认系优秀团队。如果能够更加贴地啲，了解多啲民间疾苦，制订同执行政策，多啲喺普罗大众嘅角度去睇，香港绝对经得起风浪起跌，无惧任何波折嘅！总之都系老老套套讲句：大家加油啦！香港人，就算天跌落嚟，都顶得住嘅！

资深媒体人

玮公子