政是政非 ﹕政客唔係乜都識 咪感覺當真理

靜靜地咁踏入2021，估唔到只不過係一個禮拜左右，個地球就發生驚天大事。先睇下美國吖，侵侵班支持者愈搞愈激，居然同香港班黑暴學嘢，衝擊國會山莊，企圖幫阿侵侵翻盤！不過，依班美國黑暴就冇香港咁好彩喇，保衞國會嘅人員一於冇得傾，你衝入嚟，我就請你食蓮子羹囉！睇嚟，依單嘢有排搞嘞！

嗱，香港班反對派咪係好推祟美國有人權有民主㗎咩，而家睇見美國嘅真面目，真係百般滋味在心頭囉！好嘞，講番香港，依兩日都有大事發生喎。警方引用「港區國安法」第22條，採取拂曉行動，喺全港幾十個地方同時拘捕咗53個喺舊年發起，同埋參與民主派初選嘅人士，話佢哋涉嫌顛覆國家政權，其中6人係組織同埋策劃角色，另47人就係參予者。依個行動咁大規模事前一啲風聲都漏唔出，所以都引起社會幾大關注㗎！

喺舊年人大常委通過依條「港區國安法」嘅時候，嗰班反對派仲㷫烚烚搞緊呢壇「初選」，意氣風發咁話要「35+」控制立法會，否決財政預算案癱瘓政府喎！當時已經有人話，咁搞法唔通當條國安法冇到？有手尾㗎喎！不過，班友仔就話睬你都儍！到咗今日終於要埋單嘞！唉，俗語有句話：上得山多終遇虎，反對派下下踩過界，你估次次都過到骨咩！

依單嘢喺政圈有如一石擊起千層浪，對政客嚟講，亦都係最好嘅抽水機會。有位仁兄，就急不及待出嚟抽水，但係講啲嘢九唔搭八，自己對法律唔係咁熟識，就偏偏喺法律條文度捉字虱！佢話警方解釋唔清楚班被捕者點樣構成犯罪，話要警方講清楚喎！大佬呀，你邊位呀，你又唔係警務處長，警察做嘢，駛唔駛同你報告呀？而且警方部署咁耐先至行動，梗係睇熟條「國安法」，搜哂證據㗎啦！抽水唔緊要，咪噏得就噏嘛！

而家個政圈就係咁嘞，一啲專業人士、商界精英本來喺自己範疇發光發熱，獨當一面。之但係被招攬或直選加入政壇之後，就立即覺得自己乜都識，時時感覺當真理，仲至高無上，個個要向佢交代添！其實，個政壇係需要百家爭鳴嘅，佢哋加入，應該代表番佢哋嘅專業或者界別嘅立場，只要做番本份就夠㗎喇！

資深媒體人

瑋公子