政是政非 ﹕政客唔系乜都识 咪感觉当真理

静静地咁踏入2021，估唔到只不过系一个礼拜左右，个地球就发生惊天大事。先睇下美国吖，侵侵班支持者愈搞愈激，居然同香港班黑暴学嘢，冲击国会山庄，企图帮阿侵侵翻盘！不过，依班美国黑暴就冇香港咁好彩喇，保衞国会嘅人员一于冇得倾，你冲入嚟，我就请你食莲子羹囉！睇嚟，依单嘢有排搞嘞！

嗱，香港班反对派咪系好推祟美国有人权有民主㗎咩，而家睇见美国嘅真面目，真系百般滋味在心头囉！好嘞，讲番香港，依两日都有大事发生㖞。警方引用“港区国安法”第22条，采取拂晓行动，喺全港几十个地方同时拘捕咗53个喺旧年发起，同埋参与民主派初选嘅人士，话佢哋涉嫌颠覆国家政权，其中6人系组织同埋策划角色，另47人就系参予者。依个行动咁大规模事前一啲风声都漏唔出，所以都引起社会几大关注㗎！

喺旧年人大常委通过依条“港区国安法”嘅时候，𠮶班反对派仲㷫烚烚搞紧呢坛“初选”，意气风发咁话要“35+”控制立法会，否决财政预算案瘫痪政府㖞！当时已经有人话，咁搞法唔通当条国安法冇到？有手尾㗎㖞！不过，班友仔就话睬你都儍！到咗今日终于要埋单嘞！唉，俗语有句话：上得山多终遇虎，反对派下下踩过界，你估次次都过到骨咩！

依单嘢喺政圈有如一石击起千层浪，对政客嚟讲，亦都系最好嘅抽水机会。有位仁兄，就急不及待出嚟抽水，但系讲啲嘢九唔搭八，自己对法律唔系咁熟识，就偏偏喺法律条文度捉字虱！佢话警方解释唔清楚班被捕者点样构成犯罪，话要警方讲清楚㖞！大佬呀，你边位呀，你又唔系警务处长，警察做嘢，驶唔驶同你报告呀？而且警方部署咁耐先至行动，梗系睇熟条“国安法”，搜哂证据㗎啦！抽水唔紧要，咪噏得就噏嘛！

而家个政圈就系咁嘞，一啲专业人士、商界精英本来喺自己范畴发光发热，独当一面。之但系被招揽或直选加入政坛之后，就立即觉得自己乜都识，时时感觉当真理，仲至高无上，个个要向佢交代添！其实，个政坛系需要百家争鸣嘅，佢哋加入，应该代表番佢哋嘅专业或者界别嘅立场，只要做番本份就够㗎喇！

资深媒体人

玮公子