政是政非 ﹕通訊社放料未必信得過

路透社先兩日爆料，話訪問咗兩個國內好接近中央，又一直維護中央利益嘅猛人，指即將舉行嘅人大常委會議，極可能提出改革香港立法會選舉制度。又話今年9月嘅立法會選舉可能會進一步推遲。與此同時，人民日報亦發表強硬嘅評論文章，批評本港反對派有計劃咁利用選舉奪取管治權，並且企圖將香港變成「顛覆國家」基地。嘩，一時之間，啲媒體炒到個氣氛好似有種山雨欲來嘅感覺，人人議論紛紛！

計我話，其實又唔駛咁緊張嘅！首先，人大常委會雖然訂咗喺今個月20號至22號舉行，但係呀常委宗哥都話咗啦，喺而家列出嘅討論議題中，暫時見唔到有關香港嘅問題喎！冇錯，議題可以臨時加上去，但睇嚟機會唔係咁大！點解呢？首先，按照基本法規定，改革立法會咁大件事，應由特區政府提交有關方案交由人大常委會審議，人大常委會唔會無啦啦自己提方案自己審。上次DQ宣誓玩嘢嘅立法會議員，都係經過依個既定程序，今次又點會有例外呢？而且，嚟到今日，特區政府都未見有相關動作喎！

可能有人話，而家距離1月20日仲有幾日喎，政府依幾日提上去咪得囉！嗱，政治嘅嘢一日都嫌長，唔排除有咁可能。但係改革立法會選舉制度，係一件複雜又敏感嘅大事，當中要經過好多諮詢同埋討論，仲要合情合理合法添，咁有諮詢咯，就有料漏出嚟㗎啦！不過，依單嘢事前冇收到風喎，而且咁大單嘢，特區政府又點會咁草率吖！老實講，今時今日，通訊社引述嗰啲所謂消息人士放料，真係有啲斷估，信唔過㗎！

係嘞，反而想講吓依排喺個網度有人搞咗個簽名運動，建議當局要DQ唔肯宣誓效忠國家嘅區議員，據知反應相當唔錯喎。其實，作為一個公職人員，效忠政府，效忠國家係應有之義，唔駛講㗎啦，試問世界上有邊個政府會容納一啲唔肯效忠自己嘅公職人員呢？香港要搞個簽名嚟撐依樣嘢，簡直就係丟架，笑甩人哋棚牙啦！一於快啲執行依個規定啦，唔肯宣誓嗰啲咪炒佢魷魚囉，連效忠國家都承諾唔到，擺明就係搞搞震，搏大霧揾著數之流啦，旨意佢哋造福社會？咪妄想喇！

資深傳媒人

瑋公子