政是政非 ﹕通讯社放料未必信得过

路透社先两日爆料，话访问咗两个国内好接近中央，又一直维护中央利益嘅猛人，指即将举行嘅人大常委会议，极可能提出改革香港立法会选举制度。又话今年9月嘅立法会选举可能会进一步推迟。与此同时，人民日报亦发表强硬嘅评论文章，批评本港反对派有计划咁利用选举夺取管治权，并且企图将香港变成“颠覆国家”基地。哗，一时之间，啲媒体炒到个气氛好似有种山雨欲来嘅感觉，人人议论纷纷！

计我话，其实又唔驶咁紧张嘅！首先，人大常委会虽然订咗喺今个月20号至22号举行，但系呀常委宗哥都话咗啦，喺而家列出嘅讨论议题中，暂时见唔到有关香港嘅问题㖞！冇错，议题可以临时加上去，但睇嚟机会唔系咁大！点解呢？首先，按照基本法规定，改革立法会咁大件事，应由特区政府提交有关方案交由人大常委会审议，人大常委会唔会无啦啦自己提方案自己审。上次DQ宣誓玩嘢嘅立法会议员，都系经过依个既定程序，今次又点会有例外呢？而且，嚟到今日，特区政府都未见有相关动作㖞！

可能有人话，而家距离1月20日仲有几日㖞，政府依几日提上去咪得囉！嗱，政治嘅嘢一日都嫌长，唔排除有咁可能。但系改革立法会选举制度，系一件复杂又敏感嘅大事，当中要经过好多咨询同埋讨论，仲要合情合理合法添，咁有咨询咯，就有料漏出嚟㗎啦！不过，依单嘢事前冇收到风㖞，而且咁大单嘢，特区政府又点会咁草率吖！老实讲，今时今日，通讯社引述𠮶啲所谓消息人士放料，真系有啲断估，信唔过㗎！

系嘞，反而想讲吓依排喺个网度有人搞咗个签名运动，建议当局要DQ唔肯宣誓效忠国家嘅区议员，据知反应相当唔错㖞。其实，作为一个公职人员，效忠政府，效忠国家系应有之义，唔驶讲㗎啦，试问世界上有边个政府会容纳一啲唔肯效忠自己嘅公职人员呢？香港要搞个签名嚟撑依样嘢，简直就系丢架，笑甩人哋棚牙啦！一于快啲执行依个规定啦，唔肯宣誓𠮶啲咪炒佢鱿鱼囉，连效忠国家都承诺唔到，摆明就系搞搞震，搏大雾揾着数之流啦，旨意佢哋造福社会？咪妄想喇！

资深传媒人

玮公子