政是政非 ﹕ 今日為官唔容易，係唔係都俾人鬧！

大家唔知有冇發覺，自從立法會少咗班搞搞震嘅泛民之後，建制議員喺議會上，針對官員嘅批評激咗好多呢？又有冇發現個別監察政府嘅媒體，對官員嘅鞭韃開始有啲無的放矢，過火咗啲呢？老實講，官場的確有唔少官僚歪風，啲官有時都好鬼「離地」，議員同媒體嘅責任係都監察政府，批評官員無可厚非，但一定要有根有據，情理兼備先至可以令人信服，千祈咪為鬧而鬧！

的而且確，閙人係好爽㗎，尤其對方任你鬧唔還口，仲更加過癮添！不過，究竟你閙對方嘅目的係乜先？唔係為發洩吖嘛，係因為佢哋做得唔好，所以恨鐵不成鋼，先至閙醒佢哋，等佢哋改過吖嘛！但如果為鬧而鬧，又或者搞針對咁鬧，就係過份嘞！最近政府加強防疫力度，調動咗入境處同海關依啲紀律部隊幾百人，去幫手追縱確診緊密接觸者下落。本來係一件好事，而家全城抗疫，紀律部隊發揮所長，用佢哋偵緝智慧同能力出一分力，簡直係人盡其才啦。作為部門首長嘅入境處長同埋海關關長，到場為同袍打吓氣，正常啫，又有乜好挑剔呢？之但係有人就鍾意雞蛋挑骨頭，話啲首長搏出位，搞政治騷喎！喂，大佬呀，今日做官真係難，係唔係都俾人鬧！上司鼓勵下屬都錯？打氣唔啱咩？唔係掛！唔做你哋又話，做你哋又彈，做啱你哋都唔高興！有冇咁矯枉過正呀！而家香港咁克難時期，應該要多啲鼓勵，多啲欣賞人哋嘅長處吖嘛，樣樣嘢都睇唔過眼，吓吓有彈冇讚，又有乜謂呢！

社會係需要和諧㗎，依個定律係之前嘅人撞過好多次板，先至學到嘅智慧呀。不過，近年唔知點解，社會冒起咗一種極端分化嘅歪風，唔同意見就要鬥到你死我活，破壞哂社會和諧！大家都知啦，當人嘅情緒高漲時候，往往會失去方寸做錯事，當冷靜落嚟先至恨錯難返，已經太遲喇！所以心平氣和，正面啲去睇嘢，社會氣氛祥和咗，對大家都好。時下啲人將「和諧」醜化成「河蟹」，貶低依兩個字真正意義，其實相當反智！睇吓美國侵侵嘅下場，大家就應該明，佢就係和諧嘅叛徒，吓吓撐到行唯我獨尊，卒之咪俾人背棄囉，依個世界唔係有權就大哂㗎！

話說回來嘞，香港依個彈丸之地，咁多年嚟，都係靠香港人嗰種毫不畏懼嘅正能量衝破萬難，渡過好多波折。今日我哋擁有嘅一切係得來不易㗎。2019年一場社會運動，加上依場仲未埋尾嘅疫症，香港已經衰到貼地㗎喇，我哋再冇本錢去你鬥我，我踐你咁內耗喇！大家不如用一個正面態度，互相包容，彼此尊重，和諧共處夾手夾腳，諗計仔搞返好個香港啦！

資深媒體人

瑋公子