政是政非 ﹕ 花市失而復得 今次政府就啱嘞

好快又過年喇，今年喺疫情之下過農曆年好特別，大家即將會感受到，喺限聚令之下過年嘅不一様風味！嗱，行花市本來係除夕夜嘅例牌節目，今年因為怕人多聚集容易傳播病毒，政府本來就話取消咗個年宵花市，點知啲花農嗌哂救命，民情反應亦都麻麻不滿，當局從善如流，考慮有限度恢復舉辦年宵。不過，詳情仲有待公布。究竟點樣可以做到防疫之餘，又保留番過年嘅傳統文化，俾市民行吓花市呢？都幾考功夫㗎，真係要睇政府表演喇!

無論點都好啦，政府今次「轉舦」係好事喎，證明嗰啲官員唔係鐵板一塊，肯體恤民情，寧願麻煩啲，都肯諗辦法克服佢，而為大家做番啲嘢噃！係呀，而家疫情咁嚴重，爆到成過百單確診，如果個政府官僚，唔想做嘢，就大條道理取消哂啲高風險嘅人口聚集活動啦！做乜仲要俾啲口痕友彈，話政府又試「朝令夕改」呢！的而且確，年宵花市係高危㗎，天氣凍，人來人往，迫埋一堆揀花，如果爆起上嚟，唔係講笑㗎！所以，政府依個決定，所承受嘅風險同埋壓力唔細㗎，要有周全安排，仲會動員好多個部門嘅人力，人潮管制同埋防疫措施要做到足，執行亦都要好嚴厲，先至可以萬無一失㗎！

嗱，依一舖，真係香港公務員show Quali 嘅機會。一直以嚟，香港公務員被公認優秀，而呢一次喺咁嚴重嘅疫情之下，政府敢面對困難，勇於承擔咁大風險搞花市俾大家去happy，就更加省靚個招牌啦，佢哋真係少啲信心能力都搞唔掂㗎！其實，我哋好應該用一種正面嘅態度嚟欣賞佢哋至係！仲有呀，大家去行花市嘅時候，記得要守規矩，俾多啲耐性呀，預咗到時嘅防疫措施一定好多，好繁複㗎喇！但咁樣仲好吖，措施嚴密啲，既可以保護自己，又保障他人，大家行得安心咪好囉。我哋一於疊埋心水，到時開開心心去行花市，揀番啲心水靚花，過番個好時年啦！

資深媒體人

瑋公子