政是政非 ﹕ 花市失而复得 今次政府就啱嘞

好快又过年喇，今年喺疫情之下过农历年好特别，大家即将会感受到，喺限聚令之下过年嘅不一様风味！嗱，行花市本来系除夕夜嘅例牌节目，今年因为怕人多聚集容易传播病毒，政府本来就话取消咗个年宵花市，点知啲花农嗌哂救命，民情反应亦都麻麻不满，当局从善如流，考虑有限度恢复举办年宵。不过，详情仲有待公布。究竟点样可以做到防疫之余，又保留番过年嘅传统文化，俾市民行吓花市呢？都几考功夫㗎，真系要睇政府表演喇!

无论点都好啦，政府今次“转舦”系好事㖞，证明𠮶啲官员唔系铁板一块，肯体恤民情，宁愿麻烦啲，都肯谂办法克服佢，而为大家做番啲嘢噃！系呀，而家疫情咁严重，爆到成过百单确诊，如果个政府官僚，唔想做嘢，就大条道理取消哂啲高风险嘅人口聚集活动啦！做乜仲要俾啲口痕友弹，话政府又试“朝令夕改”呢！的而且确，年宵花市系高危㗎，天气冻，人来人往，迫埋一堆拣花，如果爆起上嚟，唔系讲笑㗎！所以，政府依个决定，所承受嘅风险同埋压力唔细㗎，要有周全安排，仲会动员好多个部门嘅人力，人潮管制同埋防疫措施要做到足，执行亦都要好严厉，先至可以万无一失㗎！

嗱，依一舖，真系香港公务员show Quali 嘅机会。一直以嚟，香港公务员被公认优秀，而呢一次喺咁严重嘅疫情之下，政府敢面对困难，勇于承担咁大风险搞花市俾大家去happy，就更加省靓个招牌啦，佢哋真系少啲信心能力都搞唔掂㗎！其实，我哋好应该用一种正面嘅态度嚟欣赏佢哋至系！仲有呀，大家去行花市嘅时候，记得要守规矩，俾多啲耐性呀，预咗到时嘅防疫措施一定好多，好繁复㗎喇！但咁样仲好吖，措施严密啲，既可以保护自己，又保障他人，大家行得安心咪好囉。我哋一于叠埋心水，到时开开心心去行花市，拣番啲心水靓花，过番个好时年啦！

资深媒体人

玮公子