政是政非：舉手支持政府收緊檢疫

依個星期，本港嘅疫情終於有回落跡象嘞，無他嘅，只要官民同心，其利斷金吖嘛！嗱，講到官民同心，真係要講吓近排政府突擊圍封小區強制檢測單嘢，好多人眯埋眼就話「擾民」，有啲人仲青筋暴現，指住班辛勞工作人員係咁鬧！喂，人哋不眠不休幫緊你呀，有幾麻煩你呀？你踢對拖鞋，行落樓半粒鐘就搞掂啦，點樣擾你呀？你要死唔緊要呀，但唔好累人吖，政府未同你檢測嗰時，你哋就嘈嘈閉，而家嚟同你驗，你又話人擾你，想點呀？唉，估唔到今時今日香港，仲有咁多咁嘅人，真係情何以堪咯！

上個星期，政府突擊圍封觀塘一個私人屋苑裡面兩幢大廈，有啲居民好唔合作，唔單止嘴藐藐，仲指住啲工作人員嚟鬧！喂，依個仲話中產屋苑喎，個個受過高等教育嘅中上階層喎，咁嘅質素同表現，影衰哂啦！仲有呀，到而家為止，政府已經圍封咗幾個小區，居然有百幾二百人因為逃避檢測，被罰款5000蚊！有冇咁離譜呀，寧願被人罰都唔肯檢測？佢哋除咗係超級自私之外，真係諗唔到乜嘢其他理由嘞！喂，埋怨於事無補㗎，搞對抗更加係戇居兼愚蠢嘅行為！唔合作，唔檢測，如果真係咁好彩，係你中咗，仲周圍播毒！咁你就係社會嘅罪人啦，香港人咁聰明，依條數冇理由唔識計架！

好彩，同政府對著幹嘅人仍然係少數，幾次圍封行動，見到大部分居民都好配合，有序咁完成檢測。電視訪問咗啲居民，反應都好正面，聽到一個後生女仔仲話，一啲都唔覺擾民，仲讚揚工作人員有禮貌，有效率。佢仲話，如果政府每14日做一次就更加好嘞。嗱，依啲就係香港人本色囉，理性，有見地，仲充滿正能量添，香港後生仔如果個個係咁，明天一定係更好啦！

係嘞，政府啱啱宣布，由本月20日（星期六）起進一步收緊獲豁免到港檢疫人士，包括機組人員、來港進行貨物裝卸的貨船的換班船員，以及其他豁免人士的檢測及隔離安排。咁即係話俾大家聽，香港係要決心杜絕任何病毒流入，同埋喺社區傳播嘅機會，全心全意全速咁向清零依一個目標進發。如果，我哋市民都肯合作啲，官民一條心，過咗農曆新年之後，真有可能通到關，大家可以回復正常生活啦！

資深媒體人

瑋公子