政是政非：举手支持政府收紧检疫

依个星期，本港嘅疫情终于有回落迹象嘞，无他嘅，只要官民同心，其利断金吖嘛！嗱，讲到官民同心，真系要讲吓近排政府突击围封小区强制检测单嘢，好多人眯埋眼就话“扰民”，有啲人仲青筋暴现，指住班辛劳工作人员系咁闹！喂，人哋不眠不休帮紧你呀，有几麻烦你呀？你踢对拖鞋，行落楼半粒钟就搞掂啦，点样扰你呀？你要死唔紧要呀，但唔好累人吖，政府未同你检测𠮶时，你哋就嘈嘈闭，而家嚟同你验，你又话人扰你，想点呀？唉，估唔到今时今日香港，仲有咁多咁嘅人，真系情何以堪咯！

上个星期，政府突击围封观塘一个私人屋苑里面两幢大厦，有啲居民好唔合作，唔单止嘴藐藐，仲指住啲工作人员嚟闹！喂，依个仲话中产屋苑㖞，个个受过高等教育嘅中上阶层㖞，咁嘅质素同表现，影衰哂啦！仲有呀，到而家为止，政府已经围封咗几个小区，居然有百几二百人因为逃避检测，被罚款5000蚊！有冇咁离谱呀，宁愿被人罚都唔肯检测？佢哋除咗系超级自私之外，真系谂唔到乜嘢其他理由嘞！喂，埋怨于事无补㗎，搞对抗更加系戆居兼愚蠢嘅行为！唔合作，唔检测，如果真系咁好彩，系你中咗，仲周围播毒！咁你就系社会嘅罪人啦，香港人咁聪明，依条数冇理由唔识计架！

好彩，同政府对着干嘅人仍然系少数，几次围封行动，见到大部分居民都好配合，有序咁完成检测。电视访问咗啲居民，反应都好正面，听到一个后生女仔仲话，一啲都唔觉扰民，仲赞扬工作人员有礼貌，有效率。佢仲话，如果政府每14日做一次就更加好嘞。嗱，依啲就系香港人本色囉，理性，有见地，仲充满正能量添，香港后生仔如果个个系咁，明天一定系更好啦！

系嘞，政府啱啱宣布，由本月20日（星期六）起进一步收紧获豁免到港检疫人士，包括机组人员、来港进行货物装卸的货船的换班船员，以及其他豁免人士的检测及隔离安排。咁即系话俾大家听，香港系要决心杜绝任何病毒流入，同埋喺社区传播嘅机会，全心全意全速咁向清零依一个目标进发。如果，我哋市民都肯合作啲，官民一条心，过咗农历新年之后，真有可能通到关，大家可以回复正常生活啦！

资深媒体人

玮公子