政是政非﹕ 要人哋尊重你先要你尊重人

仲有几日就过年喇，玮公子喺度首先同各位读者拜个早年，恭祝大家新春大吉，平安喜乐！更加期望疫情快啲过，香港快啲回复正常生活。系呀，过去一年有多，市民嘅生活好唔正常！限聚令搞到人人几乎零社交；封闭公共场所，搞到打麻雀呀、唱卡拉ok呀，揼骨呀都冇埋，就连睇场戏咁低嘅要求都冇得倾，真系唔病死都闷死。最惨系班学生哥，返唔到学，运动场又闩晒，日日困喺屋企视像上堂，眼都朦又冇运动，迟吓可能仲变咗大近视添！

所以，回复正常生活好重要，而学生返学更加系重中之重啦，依个唔止系学生嘅期待，仲系好多家长嘅心声，啲家长要揾食，又要顾住冇学返嘅仔女，顾得东嚟又顾唔到西，真系人都癫！最近，本港教育局就提出咗个方案，俾啲校长考虑吓实施嘅可行性。个方案就系：“若果𠮶间学校嘅全体教职员，每14日做一次核酸检测，就可以向当局申请容许全部学生回校上半日课。”点知个方案内容刚出，部分校长同埋教师团体就即刻“起哂钢”，话当局将啲教师做磨心，唔尊重佢哋嘅专业，事前冇咨询过佢哋㖞！

喂，教育官员都讲得好清楚啦，依个方案并唔系将来全面复课嘅条件，亦唔系对学校嘅要求，唔希望对任何人构成压力，亦唔想校长感到有压力要迫老师检测。官员仲话，局方嘅立场一向系鼓励所有人自愿做检测添。咁，即系话，个方案系攞出嚟俾大家试行，唔系指标啦！呀校长，呀老师，大家都系受过敎育嘅知识份子，都应该明白事理吖，乜鬼嘢你哋都话要咨询，咁，你哋自己系咪都咁做呢？你哋而家批评官员，讲依啲说话之前，又有无咨询所有教师校长呢？喂，你哋话官员唔尊重你哋嘅专业，但系你哋又有无尊重官员经过深思熟虑，权衡各方利益之后，所做嘅专业判断呀！

香港人好钟意比较外国，部分人仲时时觉得外国嘅月亮特别圆，放督屁都系香嘅，成日乜嘢都同人比，嗱，不如睇吓美国嘞，系依一个疫情，美国系重灾区，防疫抗疫做到一坺屎咁，但当地政府仍然认为应该尽快俾学生复课。因为佢哋都知道，学生长期唔返学，衍生出嚟嘅问题，可能会好大镬，所以，佢哋最近已经部署紧初级至第八班嘅学生返学校上课呀！咪以为佢哋已经控制好疫情先至咁做，其实，美国最近单日新增感染人数虽然有回落迹象，但系就有研究话，英国流行的变种新冠病毒，正喺美国加速传播，感染率较一般新冠病毒高至少三成，预料依个变种病毒大有可能喺下月前，成为美国最常见嘅病毒株。

哗，咁危险仲要复课？如果喺香港，教育官员实俾人闹爆啦！唔止咁呀，白宫新冠疫情首席顾问福奇仲话：“政府（美国）嘅支援方案通过之后，学校复课就更加好办嘞，而首要嘅就系帮所有教师尽快接种疫苗。”哈，美国都系教师先行㖞，唔知点解佢哋啲教师又咁顺摊嘅？唉！人比人比死人，都系唔讲人哋喇，讲番香港啦，最近疫情已见有啲回落，证明香港人团结就是力量，特首寻日都话，如果疫情再稳定一啲，有望逐步放宽限聚令，香港市民好快可以回复正常生活嘞！所以，都系𠮶句啦，大家只要保持警惕，做好防护措施啦。疫苗如果可以如期嚟到，大家打埋疫苗，好快度过难关啦！

资深媒体人

玮公子