政是政非 ﹕確診跌到個位數 我哋一定要堅持

時間過得好快，眨吓眼又過完個農暦新春假期，大家又要疊埋心水返工嘞。正所謂：未過十五，仲係拜年時。瑋公子恭祝大家新年順景！心想事成！嗱，過咗個年，好事自然來！最好嘅消息莫過於政府宣布年初七起放寛限聚令，夜晚可以4人同枱，食飯吹水到10點啦！香港人，困咗咁耐，終於可以放鬆下喇！

喺大家忍耐，同心協力之下，新春假期，本港録得嘅確診數字，由低雙位跌到單位數字，真係可喜可賀。如果一直跌到零，保持住穩定，不但止可以解除限聚令，連內地通關都有可能。所以，我哋真係要keep住警覺性，配合政府防疫抗疫措施，自己一有唔妥，又或者有親友唔妥，就快啲去檢測，唔好拖，亦唔好俾社區再有隱藏傳播者，周圍播毒，我哋好快就度過難關㗎喇！

大家要記住，政府喺初七放寛限聚令嘅先決條件，係需要大家合作嘅，首先，多個指定行業同埋處所嘅從業員，包括：餐飲、美容、體育、娛樂等等，都要平均每兩星期一次接受免費檢測，而一般市民都要下載政府嘅「安心出行」App，每進出餐飲場所都要嘟一次，留底紀錄，方便當局人員嘅追查。嗱，有啲人聽到咁嘅安排，第一反應就會覺得：「麻乜煩，駛唔駛咁呀！」但係大家諗深一層，依啲措施咁嚴謹，其實係保障緊大家，係要杜絕病毒傳播，係要大家快啲回復正常生活嘛，自己做多少少，麻煩一啲，又有乜咁難為呢？

講到難，政府仲難啦，依個每14日檢測一次嘅措施，一啲都唔易搞，初步統計，包括指定群組、處所嘅人員，原來有成56萬咁多，依個數目幾乎已經係當局檢測能力上限，所動用人力物力、資源巨大，唔係嘢少㗎！咁嘅環境，檢測人員都唔怕工作繁重，支援人員又唔怕煩啦！係，我哋係要做多啲嘢，花多時間，但依啲犧牲換嚟大家安心，仲有機會快啲清零，咁，又有乜所謂呢！

話哂都係新春，大家應該多啲正能量。公子就八卦到一個路邊社消息，雖然唔係官方，但係大家聽下，開心下，有個希望，集合埋一股巨大正能量，真係有可能成為事實㗎！路邊社消息就話，喺當局官員多番努力爭取之下，只要香港長時間維持單位數確診數字，即係未必一定要清零，極有可能有機會同內地會局部通關。消息仲話，其實喺第四波爆發之前，內地海關都基本上都已經準備好哂喇，點知跟住就爆個第四波，一拖就拖咁耐！而家香港人咁努力之下，確診又跌到個位數喇，只要keep住係咁，就望見家鄉啦！正所謂：希望在明天嘛！嗱，個消息真又好，假又好，我哋只要有希望，明天一定會更好！

資深媒體人

瑋公子