政是政非 ﹕确诊跌到个位数 我哋一定要坚持

时间过得好快，眨吓眼又过完个农暦新春假期，大家又要叠埋心水返工嘞。正所谓：未过十五，仲系拜年时。玮公子恭祝大家新年顺景！心想事成！嗱，过咗个年，好事自然来！最好嘅消息莫过于政府宣布年初七起放寛限聚令，夜晚可以4人同枱，食饭吹水到10点啦！香港人，困咗咁耐，终于可以放松下喇！

喺大家忍耐，同心协力之下，新春假期，本港录得嘅确诊数字，由低双位跌到单位数字，真系可喜可贺。如果一直跌到零，保持住稳定，不但止可以解除限聚令，连内地通关都有可能。所以，我哋真系要keep住警觉性，配合政府防疫抗疫措施，自己一有唔妥，又或者有亲友唔妥，就快啲去检测，唔好拖，亦唔好俾社区再有隐藏传播者，周围播毒，我哋好快就度过难关㗎喇！

大家要记住，政府喺初七放寛限聚令嘅先决条件，系需要大家合作嘅，首先，多个指定行业同埋处所嘅从业员，包括：餐饮、美容、体育、娱乐等等，都要平均每两星期一次接受免费检测，而一般市民都要下载政府嘅“安心出行”App，每进出餐饮场所都要嘟一次，留底纪录，方便当局人员嘅追查。嗱，有啲人听到咁嘅安排，第一反应就会觉得：“麻乜烦，驶唔驶咁呀！”但系大家谂深一层，依啲措施咁严谨，其实系保障紧大家，系要杜绝病毒传播，系要大家快啲回复正常生活嘛，自己做多少少，麻烦一啲，又有乜咁难为呢？

讲到难，政府仲难啦，依个每14日检测一次嘅措施，一啲都唔易搞，初步统计，包括指定群组、处所嘅人员，原来有成56万咁多，依个数目几乎已经系当局检测能力上限，所动用人力物力、资源巨大，唔系嘢少㗎！咁嘅环境，检测人员都唔怕工作繁重，支援人员又唔怕烦啦！系，我哋系要做多啲嘢，花多时间，但依啲牺牲换嚟大家安心，仲有机会快啲清零，咁，又有乜所谓呢！

话哂都系新春，大家应该多啲正能量。公子就八卦到一个路边社消息，虽然唔系官方，但系大家听下，开心下，有个希望，集合埋一股巨大正能量，真系有可能成为事实㗎！路边社消息就话，喺当局官员多番努力争取之下，只要香港长时间维持单位数确诊数字，即系未必一定要清零，极有可能有机会同内地会局部通关。消息仲话，其实喺第四波爆发之前，内地海关都基本上都已经准备好哂喇，点知跟住就爆个第四波，一拖就拖咁耐！而家香港人咁努力之下，确诊又跌到个位数喇，只要keep住系咁，就望见家乡啦！正所谓：希望在明天嘛！嗱，个消息真又好，假又好，我哋只要有希望，明天一定会更好！

资深媒体人

玮公子