政是政非 ﹕撑完善選舉制度　抗疫就要打疫苗

社會最近新鮮滾熱辣嘅話題，政治方面，當然係全國人大通過「完善香港選舉制度，實行愛國者治港」啦，而民生嘅話題，始終係「究竟打唔打疫苗好呢？」

先講人大單嘢，好多香港人就話，阿爺隻手伸得咁入，一國兩制依趟玩完啦！嗱，任何事都有前因先至有後果。一國兩制係阿爺為香港度身訂造嘅，一定希望能夠行穩致遠。香港人要求嘅政制改革同全面普選，阿爺亦都應承可以逐步實現。不過，先快條件係因應時局發展同埋社會形勢嚟決定進度，阿爺並無既定時間表。之但係，一班自稱泛民嘅仁兄，就要將一套連西方社會都冇辦法實施嘅政制標準套入香港，不但要阿爺接受，仲要一步到位，爭取唔到就話阿爺破壞一國兩制，煽動學生、民衆參予黑暴，無視法治，破壞社會秩序，超越哂大部分香港人嘅底線！阿爺先至忍無可忍，唯有出手！

有個比喻其實幾貼切㗎：「阿媽買咗包糖俾阿仔，一心都係想佢高興。不過，一次過成包糖俾哂佢，怕佢冇節制係咁食會壞牙，所以俾住一粒先啦！阿仔唔制扭計，阿媽於是俾佢兩粒啦，仲話如果佢乖乖地，一陣再俾佢兩粒，甚至更多！點知阿仔點都唔制，係都要成包，唔止蹬地大叫大鬧發爛渣，仲打爛玻璃，掟爛哂屋企啲嘢！阿媽於是收番哂佢啲糖，阿仔結果一粒都冇，仲要罰企，飯都冇得食！」大家睇完依個故仔，係咪熟口熟面呢？

講番民生嘞，最近全球都開始打疫苗嘞，但係咁多隻疫苗打邊隻好呢？又真係幾傷腦筋！最弊係隻隻疫苗都有死亡個案，搞到啲人個個患上有「打又唔係，唔打又唔係」嘅選擇困難症，於是就抱住「睇定啲先」嘅心態啦！咁，香港人自願接種疫苗嘅數字，自然就唔「靚仔」喇，而更加弊係依種「冇疫苗就盼疫苗，有疫苗又唔去打」嘅情況，大大減低咗本港嘅抗疫成果，亦令到我哋想通關，想重振經濟嘅願望幻滅！

計我話，香港人真係唔駛咁驚喎，正如專家袁國勇話齋，日日都有死亡個案，不過近日嘅死者咁啱又打咗疫苗，所以個數字睇起上嚟好似好得人驚，而且，嗰啲話打咗疫苗死亡嘅人，大部分都係長期病患者，未必關疫苗事喎！其實邊啲人唔適合打呢，當局都列哂出嚟啦，正正常常嘅人又有乜好驚呢！

資深媒體人

瑋公子