政是政非 ﹕完善選舉時間表須仔細斟酌

全國人大通過完善香港選舉制度，人大常委會就預期喺下星期商討修改基本法附件一同附件二嘅細節，而有關完善選舉制度嘅本地立法工作就會展開，未來一年選舉嘅具體時間表亦都成為各方焦點。特首雖然一而再強調希望喺未來十二個月之內，完成選委會、立法會同埋特首選舉。不過，有重量級政圈人士就認為完善制度咁複雜嘅嘢，最好做得仔細啲，唔好操之過急！

咪就係前立法會主席曾鈺成囉，佢先幾日接受媒體訪問時話：即使選舉委員會選舉同立法會選舉對調，立法會選舉亦應延至特首選舉之後嘅2022年9月舉行，無須趕急喺預期嘅2021年12月。佢嘅理由好簡單，因為預料喺完善制度方面，有唔少法律、技術等相關問題，一定要做到萬無一失，如果匆匆忙忙趕住做。容易有所遺漏，將來再補修反而仲麻煩，咁，不如預留充足時間去解決咗先啦，避免俾人有藉口話立法會變咗橡皮圖章喎！

嗱，依位前立法會主席熟悉立法會程序同審議過程，而且經驗豐富，佢講嘅嘢有啲道理㗎。其實，今次選舉制度大幅改動，即使立法會加班，審議好政府提交嘅主體法案，並唔代表未來嘅選舉就會一帆風順。仲有好多工作，仍要按現有機制交由選舉管理委員會處理，當中嘅諮詢同埋行政程序都好花時間，唔排除仲可能涉及唔同政治板塊嘅角力，冇可能一蹴而就！

另一方面，喺選舉委員會選舉嚟睇，除咗議席數目同界別分組嘅改變，新增以及原有團體或者個人代表嘅資格亦都會重新洗牌，喺選民登記制度方面要有相應修改。至於立法會選舉就更加複雜嘞，就算日後整體直選議席減少，餘下點樣選區劃界，如何議席分布，唔同政團都已經虎視眈眈，勢必引起激烈爭奪，再加上新增選舉委員會委員提名、資格審查委員會審核等嘅新要求，要完成整個討論、修例以至落實過程，真唔係一時三刻可以做到嘅事，如果貪快趕住做，當中難免有甩漏，影響可能會好大㗎！

喺以往，選舉委員會嘅唯一責任係選舉特首。而新嘅選舉制度下，選舉委員會恢復咗選舉立法會議員嘅職能，換言之，選委嘅責任更大，地位亦更加高嘞。選舉委員會會委員，一定成為政圈中人必爭之地！仲有呀，立法會議員參選資格委員會，操參選者生殺大權，如果能躋身其中，政壇地位之高，更加唔講得笑！總之，嚟緊嘅日子，本港政治遊戲將有新嘅規則，政圈風起雲湧，肯定好戲連場，幕幕精彩，千祈咪走雞呀！

資深媒體人

瑋公子