政是政非 ﹕完善选举时间表须仔细斟酌

全国人大通过完善香港选举制度，人大常委会就预期喺下星期商讨修改基本法附件一同附件二嘅细节，而有关完善选举制度嘅本地立法工作就会展开，未来一年选举嘅具体时间表亦都成为各方焦点。特首虽然一而再强调希望喺未来十二个月之内，完成选委会、立法会同埋特首选举。不过，有重量级政圈人士就认为完善制度咁复杂嘅嘢，最好做得仔细啲，唔好操之过急！

咪就系前立法会主席曾钰成囉，佢先几日接受媒体访问时话：即使选举委员会选举同立法会选举对调，立法会选举亦应延至特首选举之后嘅2022年9月举行，无须赶急喺预期嘅2021年12月。佢嘅理由好简单，因为预料喺完善制度方面，有唔少法律、技术等相关问题，一定要做到万无一失，如果匆匆忙忙赶住做。容易有所遗漏，将来再补修反而仲麻烦，咁，不如预留充足时间去解决咗先啦，避免俾人有借口话立法会变咗橡皮图章㖞！

嗱，依位前立法会主席熟悉立法会程序同审议过程，而且经验丰富，佢讲嘅嘢有啲道理㗎。其实，今次选举制度大幅改动，即使立法会加班，审议好政府提交嘅主体法案，并唔代表未来嘅选举就会一帆风顺。仲有好多工作，仍要按现有机制交由选举管理委员会处理，当中嘅咨询同埋行政程序都好花时间，唔排除仲可能涉及唔同政治板块嘅角力，冇可能一蹴而就！

另一方面，喺选举委员会选举嚟睇，除咗议席数目同界别分组嘅改变，新增以及原有团体或者个人代表嘅资格亦都会重新洗牌，喺选民登记制度方面要有相应修改。至于立法会选举就更加复杂嘞，就算日后整体直选议席减少，余下点样选区划界，如何议席分布，唔同政团都已经虎视眈眈，势必引起激烈争夺，再加上新增选举委员会委员提名、资格审查委员会审核等嘅新要求，要完成整个讨论、修例以至落实过程，真唔系一时三刻可以做到嘅事，如果贪快赶住做，当中难免有甩漏，影响可能会好大㗎！

喺以往，选举委员会嘅唯一责任系选举特首。而新嘅选举制度下，选举委员会恢复咗选举立法会议员嘅职能，换言之，选委嘅责任更大，地位亦更加高嘞。选举委员会会委员，一定成为政圈中人必争之地！仲有呀，立法会议员参选资格委员会，操参选者生杀大权，如果能跻身其中，政坛地位之高，更加唔讲得笑！总之，嚟紧嘅日子，本港政治游戏将有新嘅规则，政圈风起云涌，肯定好戏连场，幕幕精彩，千祈咪走鸡呀！

资深媒体人

玮公子