政是政非 ﹕疫情受控 朝新路向回復正常

上個星期四，行政長官終於可以正正常常，冇人騷擾之下，喺立法會完成咗佢個半小時嘅答問大會。依次同立法會議員嘅交流，由政治範疇中「完善選舉制度」嘅跟進，以至民生關注嘅「控煙標準考量」，甚而城市發展項目嘅「沙嶺殯儀城」都涉獵探討，可謂內容豐富。希望依個好嘅勢頭，可以keep住落去啦！

阿爺出手完善重新港選舉制度，將來香港嘅政治文化同埋遊戲規則，會有重大改變。而家好多細節未出，政團同政客要點樣部署應對，仲未有明確方向。阿爺依鋪講到明要攞番個主導權，究竟會留番幾多空間俾大家去爭呢？暫時冇人會知！「執生」向來係香港人強項，政壇中人惟有昅實個形勢發展執生喇！之但係「愛國者治港」依條法規，阿爺就毫無懸念咁話俾香港人聽，你如果唔愛國，就唔駛旨意做政府工，更加唔好諗住喺個政圈度搞搞震嘞，若果你仍然有幻想，以為阿爺會扮唔知？就太天真喇！

答問大會上，有議員問行政長官，香港啲官員同埋嗰啲所謂專家，喺制定政策同諮詢參考意見嘅時候，習慣只用國際標準，對國家嘅意見、調査報告、甚至法則都視而不見！例如最近好heat嘅規管新型煙草問題吖，立法會起草委員會大部分委員都好勤力，參考咗包括內地同其他各國資料，權衡業界同64萬煙民權益之後，達成咗一個共識，就係同意政府「禁售電子煙管制加熱煙。依個同時亦都係國內現時嘅標準，情理法兼備。不過，代表政府出席嘅官員不但冇向議員提供國內資料，就連議員向佢哋提出，官員仍認為兩地情況唔同，法制唔一樣等諸多藉口，死牛一邊頸，堅持兩種煙都要禁。雖然唔係樣樣嘢要跟足國家先至係愛國，但議員就問行政長官：作為特區官員，依種輕視甚至無視國家現況，連參考都拒絕嘅態度又啱唔啱呢？

好嘞，講番疫情喇，行政長官啱啱宣布咗「疫苗氣泡」，係本港嘅防疫新路向，如果市民合作，肯打疫苗，肯下載安心出行，生活就可以慢慢恢復正常。食肆可以分階段由4人限聚逐步加到12人；宴會限聚亦可以最高人數去到100人；而市民最關心嘅通關，開放個別國家旅遊氣泡，而返內地嘅通關，亦都先放寛貨車司機嘅檢測要求。即係話，一切向好嘅方面發展，如果疫情受控，市民合作，我哋就望見家鄉喇！香港人，加油啦！

資深媒體人

瑋公子