政是政非：專業新聞從業員點會容忍假新聞　文：瑋公子

警隊一哥早排批評個別媒體製造「假新聞」嘅行為，引起社會關注。好多人都撐一哥，話佢勇敢，事關媒體力量之大無遠弗至，佢哋揸住所謂嘅第四權，基本上可以「監察」你，「審查」你，如果你有乜行差踏錯，甚至可以起你底，將你「惡行」公諸於世，話警惕世人喎！正所謂聖賢都有錯，人活於世，點都有唔小心做錯嘢㗎啦，尤其係德高望重嘅大人物，俾媒體爆出嚟，小事化大，大到分分鐘損咗名聲，就無謂啦！所以，一哥咁高調咁話「部分」傳媒做假新聞，都幾夠「吉士」，起碼以前冇人夠膽咁做囉！

嗱，新聞界向來都係備受敬重，喺以前，新聞紙（報紙）刊登嘅嘢，基本上都唔會錯，讀者信到十足十，而政府有啲政策「放風」，亦都借助新聞紙嘅影響力測試吓民意。記者喺一般人心目中，除咗「鐵腳馬眼神仙肚」好捱得之外，仲係比一般人消息靈通嘅權威先知添。記得我哋初入行嘅時候，老前輩教誨：未得到百分百求證嘅嘢，千祈咪亂寫，因為新聞紙一登，就會有好大影響，人哋嘅名聲、前途甚至以後嘅人生，都可能因為你支筆點寫而受到影響。所以，我哋當年寫新聞，求證嘅過程長過寫稿好多。有啲稿用咗唔少時間去寫，但係最後因為某啲內容求證唔到，最終要丟落垃圾桶！

咁，當然啦，咁嚴謹嘅求證過程梗係麻煩啦！有好多故仔（新聞內容）鬼咁煽情又趣味濃郁，求證唔到咪嘥料？於是喺唔知幾時開始，有一張新聞紙，一邊話自己「絕對求證」，另一邊就將Hearsay 嘅聽聞當正新聞嚟做。咁樣佢張新聞紙自然就多咗好多好juice 嘅故仔啦，讀者又點知啫，見佢咁多嘢睇，梗係捧場啦！搞搞吓，向來好嚴謹求證嘅行家唔覺唔覺有樣學樣，Hearsay聽聞變新聞嘅歪風竟然成為主流！你哋可能會問：嘩，咁都得咩？係呀，本來就唔得嘅，不過，有個好聰明嘅人，諗咗個自己呃自己嘅方法，就係喺段未求證嘅故仔後面，加一句「直至截稿前，當事人仍未回覆」，咁段內容有幾真？交俾讀者自已判斷喇！

其實，咁樣做唔止自己呃自己，仲好唔負責任添，讀者睇完內容先入為主啦，如果全部都唔係事實，就算第二日求證到先至更正，都改變唔到讀者的第一印象同埋認知！依個世界就係咁，集非成是之後，就會愈來愈放肆，去年一場社會運動，部分媒體為咗政治目的，無所不用其極，將Hearsay發揮到淋漓盡致，進化為老作嘅「假新聞」。明明冇死人就話死咗人，仲作到似層層，話連屍體都燒埋；明明冇強姦話俾人強姦，最後發現事主其實係「演員」；少女明明係自殺，就話佢被謀殺，死者阿媽出嚟作證，都質疑佢講假話；仲有女子俾黒暴射爆眼，又屈係差人射傷佢。依啲未經證實嘅「假新聞」卒之令唔少人信以為真，對警隊聲譽造成極大傷害，就算一哥咁肉緊反擊，亦都冇辦法彌補！

本港當下有幾個新聞人員組成嘅組織，佢哋嘅責任除咗維護新聞從業者嘅權益之外，對反撃依類「假新聞」嘅橫行無忌，理該責無旁貸，可惜，一直口口聲聲好專業嘅「記者協會」視而不見，噤若寒蟬！唔知係咪好似我剛才話齋，怕得罪媒體冇運行，抑或都怕俾人起底呢？計我話，本港嘅新聞從業者係時候思考一下，如果依個組織嘅功能走咗樣，係咪應該另外組織一個唔受媒體老闆影響，唔受政治干擾，而係真正專業嘅代表性組織呢？

資深媒體人

瑋公子