政是政非：专业新闻从业员点会容忍假新闻　文：玮公子

警队一哥早排批评个别媒体制造“假新闻”嘅行为，引起社会关注。好多人都撑一哥，话佢勇敢，事关媒体力量之大无远弗至，佢哋揸住所谓嘅第四权，基本上可以“监察”你，“审查”你，如果你有乜行差踏错，甚至可以起你底，将你“恶行”公诸于世，话警惕世人㖞！正所谓圣贤都有错，人活于世，点都有唔小心做错嘢㗎啦，尤其系德高望重嘅大人物，俾媒体爆出嚟，小事化大，大到分分钟损咗名声，就无谓啦！所以，一哥咁高调咁话“部分”传媒做假新闻，都几够“吉士”，起码以前冇人够胆咁做囉！

嗱，新闻界向来都系备受敬重，喺以前，新闻纸（报纸）刊登嘅嘢，基本上都唔会错，读者信到十足十，而政府有啲政策“放风”，亦都借助新闻纸嘅影响力测试吓民意。记者喺一般人心目中，除咗“铁脚马眼神仙肚”好挨得之外，仲系比一般人消息灵通嘅权威先知添。记得我哋初入行嘅时候，老前辈教诲：未得到百分百求证嘅嘢，千祈咪乱写，因为新闻纸一登，就会有好大影响，人哋嘅名声、前途甚至以后嘅人生，都可能因为你支笔点写而受到影响。所以，我哋当年写新闻，求证嘅过程长过写稿好多。有啲稿用咗唔少时间去写，但系最后因为某啲内容求证唔到，最终要丢落垃圾桶！

咁，当然啦，咁严谨嘅求证过程梗系麻烦啦！有好多故仔（新闻内容）鬼咁煽情又趣味浓郁，求证唔到咪嘥料？于是喺唔知几时开始，有一张新闻纸，一边话自己“绝对求证”，另一边就将Hearsay 嘅听闻当正新闻嚟做。咁样佢张新闻纸自然就多咗好多好juice 嘅故仔啦，读者又点知啫，见佢咁多嘢睇，梗系捧场啦！搞搞吓，向来好严谨求证嘅行家唔觉唔觉有样学样，Hearsay听闻变新闻嘅歪风竟然成为主流！你哋可能会问：哗，咁都得咩？系呀，本来就唔得嘅，不过，有个好聪明嘅人，谂咗个自己呃自己嘅方法，就系喺段未求证嘅故仔后面，加一句“直至截稿前，当事人仍未回复”，咁段内容有几真？交俾读者自已判断喇！

其实，咁样做唔止自己呃自己，仲好唔负责任添，读者睇完内容先入为主啦，如果全部都唔系事实，就算第二日求证到先至更正，都改变唔到读者的第一印象同埋认知！依个世界就系咁，集非成是之后，就会愈来愈放肆，去年一场社会运动，部分媒体为咗政治目的，无所不用其极，将Hearsay发挥到淋漓尽致，进化为老作嘅“假新闻”。明明冇死人就话死咗人，仲作到似层层，话连尸体都烧埋；明明冇强奸话俾人强奸，最后发现事主其实系“演员”；少女明明系自杀，就话佢被谋杀，死者阿妈出嚟作证，都质疑佢讲假话；仲有女子俾黒暴射爆眼，又屈系差人射伤佢。依啲未经证实嘅“假新闻”卒之令唔少人信以为真，对警队声誉造成极大伤害，就算一哥咁肉紧反击，亦都冇办法弥补！

本港当下有几个新闻人员组成嘅组织，佢哋嘅责任除咗维护新闻从业者嘅权益之外，对反撃依类“假新闻”嘅横行无忌，理该责无旁贷，可惜，一直口口声声好专业嘅“记者协会”视而不见，噤若寒蝉！唔知系咪好似我刚才话斋，怕得罪媒体冇运行，抑或都怕俾人起底呢？计我话，本港嘅新闻从业者系时候思考一下，如果依个组织嘅功能走咗样，系咪应该另外组织一个唔受媒体老板影响，唔受政治干扰，而系真正专业嘅代表性组织呢？

资深媒体人

玮公子