政是政非 ﹕俾人DQ不如索性自己辭職

2019年嘅區議會選舉，選舉人數創下香港史上新高，共有2,943,842名登記選民投票，投票率71.23%，民主派陣營喺高投票率下，首次多區大獲全勝，取得全港86%嘅直選議席。依班新貴意氣風發，以為已經擁有全世界，恃住人多把持區議會為所欲為，風頭一時無兩！

同年，本港發生咗一次無法無天嘅黑暴，市民無端端喺街度俾人打，商舖無啦啦俾人爆玻璃放火燒。依班平時牙斬斬話幫市民乜，幫街坊物嘅新貴，不但扮鵪鶉無聲又兼無影，唔少人仲參予甚至涉嫌策動黑暴，搞到個香港亂哂籠！若唔係忠毅勇武嘅警隊頂住，中央及時制定國安法，香港真係唔知點收科！

好嘞，時間過得好快，2023年又輪到新一屆，不過，立法會今年即將通過嘅《2021年公職（參選及任職）條例草案》，要求現任區議員必須如公務員一樣，宣誓擁護《基本法》效忠中華人民共和國同埋香港特別行政區政府。條例草案又建議行政長官、立法會及區議會選舉中加入限制，任何人若經因拒絕或忽略作出宣誓而被取消就任相關公職資格，或違反誓言，或不符合「擁護《基本法》、效忠香港特區」的法定要求和條件，即喪失在5年內於相關選舉中被提名或當選嘅資格，以彰顯誓言莊嚴。而到今個月12號，立法會就將上述條例最後審議，然後通過。咁即係話，唔駛等到2023年，仲有一年多任期嘅現任區議員都規定必須宣誓效忠國家同埋特區政府。

嗱，一個人夠唔夠醒目，睇佢到咗緊要關頭做嘅判斷同決定，就知佢係龍定係蟲！ 大家有冇發覺到，依個宣誓嘅條例草案雖然尚未通過，但最近大大話話就已經有十幾廿友新貴區議員自動辭咗職呢？ 咁，有冇諗過一份咁薪優糧準，唔駛點做就可以攞住個名作威作福嘅筍工，點解要辭呢？

其實，依個世界係冇免費午餐嘅，更加唔會咁容易搏到懵，嗰班新貴贏咗選舉之後，明目張膽任意妄為，部分人甚至叫哂口號宣揚港獨。而家，宣誓條例要求發誓效忠國家同埋特區政府，佢哋若果就範，就俾黑暴當正二五仔，如果唔宣誓，肯定被DQ！況且，就算佢哋發誓效忠國家同埋特區政府，有冇人信呢？做過咁多衰嘢，你估呃到人咩，結局唔係一樣被DQ！到咗嗰時仲更加瘀皮啦！

咁點好呢？如果你問我，我就會話：醒目仔挑通眼眉，梗係應該自動辭職啦，至少喺依一刻可以扮「瀟灑」全身而退吖嘛！但係，如果賴死唔走，手尾就長喇！嗱，魔鬼往往喺細節裏面，用下個腦即刻就明。嗰班區會新貴就算肯「屈就」宣誓效忠，但根本與事實不符，咁就等同「發假誓」，肯定最終都會被DQ，即時會被追收番先前收取嘅議員津貼同埋相關費用，閒閒地都要十幾廿萬，好大鑊㗎！不過，假若佢哋一早自動辭咗職，最多係冇咗份工啫，依條數就唔駛孭嘞，因為有關部門冇藉口嚟追數。你話嘞，聰明仔會點揀？自動辭職抑或拖到最後俾人踢出局，冇咗收入仲要跑數還錢呢？ 喂，大家不妨又睇下嗰班最叻喺後面鼓吹黑暴嘅「民主派」雙料議員做咗乜？佢哋第一時間就辭咗區議員份工，保住個荷包先啦！之不過，佢哋唔話俾人聽，自己走先之嘛！如果你仲儍吓儍吓唔識跟隊，係咪笨實吖！

唉，現實係咁殘酷㗎喇，正所謂：出得嚟行，預咗要還！當日黑暴所種下嘅孽，今日係要找數㗎！只不過，如果睇得通個局，識得走位，或者可以冇咁傷嘅！嗰班區會新貴識諗嘅，應該知點做喇啩！

資深傳媒人

瑋公子