政是政非 ﹕俾人DQ不如索性自己辞职

2019年嘅区议会选举，选举人数创下香港史上新高，共有2,943,842名登记选民投票，投票率71.23%，民主派阵营喺高投票率下，首次多区大获全胜，取得全港86%嘅直选议席。依班新贵意气风发，以为已经拥有全世界，恃住人多把持区议会为所欲为，风头一时无两！

同年，本港发生咗一次无法无天嘅黑暴，市民无端端喺街度俾人打，商舖无啦啦俾人爆玻璃放火烧。依班平时牙斩斩话帮市民乜，帮街坊物嘅新贵，不但扮鹌鹑无声又兼无影，唔少人仲参予甚至涉嫌策动黑暴，搞到个香港乱哂笼！若唔系忠毅勇武嘅警队顶住，中央及时制定国安法，香港真系唔知点收科！

好嘞，时间过得好快，2023年又轮到新一届，不过，立法会今年即将通过嘅《2021年公职（参选及任职）条例草案》，要求现任区议员必须如公务员一样，宣誓拥护《基本法》效忠中华人民共和国同埋香港特别行政区政府。条例草案又建议行政长官、立法会及区议会选举中加入限制，任何人若经因拒绝或忽略作出宣誓而被取消就任相关公职资格，或违反誓言，或不符合“拥护《基本法》、效忠香港特区”的法定要求和条件，即丧失在5年内于相关选举中被提名或当选嘅资格，以彰显誓言庄严。而到今个月12号，立法会就将上述条例最后审议，然后通过。咁即系话，唔驶等到2023年，仲有一年多任期嘅现任区议员都规定必须宣誓效忠国家同埋特区政府。

嗱，一个人够唔够醒目，睇佢到咗紧要关头做嘅判断同决定，就知佢系龙定系虫！ 大家有冇发觉到，依个宣誓嘅条例草案虽然尚未通过，但最近大大话话就已经有十几廿友新贵区议员自动辞咗职呢？ 咁，有冇谂过一份咁薪优粮准，唔驶点做就可以攞住个名作威作福嘅笋工，点解要辞呢？

其实，依个世界系冇免费午餐嘅，更加唔会咁容易搏到懵，𠮶班新贵赢咗选举之后，明目张胆任意妄为，部分人甚至叫哂口号宣扬港独。而家，宣誓条例要求发誓效忠国家同埋特区政府，佢哋若果就范，就俾黑暴当正二五仔，如果唔宣誓，肯定被DQ！况且，就算佢哋发誓效忠国家同埋特区政府，有冇人信呢？做过咁多衰嘢，你估呃到人咩，结局唔系一样被DQ！到咗𠮶时仲更加瘀皮啦！

咁点好呢？如果你问我，我就会话：醒目仔挑通眼眉，梗系应该自动辞职啦，至少喺依一刻可以扮“潇洒”全身而退吖嘛！但系，如果赖死唔走，手尾就长喇！嗱，魔鬼往往喺细节里面，用下个脑即刻就明。𠮶班区会新贵就算肯“屈就”宣誓效忠，但根本与事实不符，咁就等同“发假誓”，肯定最终都会被DQ，即时会被追收番先前收取嘅议员津贴同埋相关费用，闲闲地都要十几廿万，好大镬㗎！不过，假若佢哋一早自动辞咗职，最多系冇咗份工啫，依条数就唔驶孭嘞，因为有关部门冇借口嚟追数。你话嘞，聪明仔会点拣？自动辞职抑或拖到最后俾人踢出局，冇咗收入仲要跑数还钱呢？ 喂，大家不妨又睇下𠮶班最叻喺后面鼓吹黑暴嘅“民主派”双料议员做咗乜？佢哋第一时间就辞咗区议员份工，保住个荷包先啦！之不过，佢哋唔话俾人听，自己走先之嘛！如果你仲儍吓儍吓唔识跟队，系咪笨实吖！

唉，现实系咁残酷㗎喇，正所谓：出得嚟行，预咗要还！当日黑暴所种下嘅孽，今日系要找数㗎！只不过，如果睇得通个局，识得走位，或者可以冇咁伤嘅！𠮶班区会新贵识谂嘅，应该知点做喇啩！

资深传媒人

玮公子