政是政非 ﹕瓜田李下唔避忌 次次咁好彩咩 - 昭傳媒 UniqueMedia.hk
     

政是政非 ﹕瓜田李下唔避忌 次次咁好彩咩

正所謂:長江後浪推前浪,一代新人換舊人,每一個年代都會有一啲代表性人物被封為偶像。娛樂圈依個萬紫千紅嘅世界,自然唔會缺少萬人迷,美少女,以及歌王歌后依一類被捧為星級偶像嘅新秀,佢哋小小年紀,就被捧上天,被祟拜,被模仿,一舉一動成為Fans嘅焦點,一顰一笑觸動好多人嘅情感。依一種普通人無法得到嘅魔力,帶嚟好大滿足感,使人著迷,亦容易令人不知不覺失去自我!儘管如此,每一個年代仍然有好多年青人夢想自己成為偶像,一嚐滋味!

七十至九十年代係香港人嘅奮鬥期,亦可算係娛樂圈光輝燦爛時代。依幾個年代,我哋唔單止有歌王歌后,仲有歌神添,跟住又有天王天后,認真熱鬧。依班偶像嘅才藝受到肯定,佢哋生活動向亦都成為八卦新聞主流。睇佢哋表演,有電視電影演唱會,聽佢哋唱歌有電台唱片,仲有CD;至於佢哋嘅緋聞情史又或者係事業發展,就係報紙雜誌嘅主線古仔。總之,佢哋已經融入咗每個人生活,好似你鄰居,好似你朋友,甚至親人。

歌星偶像影響力大,公眾對佢哋期望大,品格要求自然比一般人高,因為佢哋舉止言行,有好多人模仿,品德高尚,佢哋嘅Fans就唔會低俗。所以,佢哋被現實環境訓練到自我檢點能力相當高,唔敢行差踏錯,因為偶一不慎,稍有縱情出軌就可能墮入深淵,永不超生!咁多年嚟,活生生例子屢見不鮮,記憶猶新嘅電視姐仔背男友偷搭有妻之夫男歌手,最終人間蒸發,前途茫茫!你可能會話,男歡女愛之事本是平常,唔應該咁大劑噃!但係,現實就係咁苛刻,有名氣就係要受到嚴厲監督,標準比普通人係高啲㗎喇,鬼叫你你哋出名咩!

嗱,新鮮滾熱辣又有一劑,大家都記得啦,早排黑暴橫行,搞到天下大亂。黑喼帽黑衫黑褲,加埋個黑口罩,已經被認定係黑暴嘅制服啦,普通人都會避忌下。徧徧就有個近年被封為全民新星嘅哥仔,喺一個好敏感嘅「反納粹遊行」嘅日子,戴黑帽黑口罩,著住黑衫黑褲,話去排舞出現喺銅鑼灣。嗰日咁敏感,警方梗係嚴陣以待啦,見到個咁嘅打扮人士,唔截停搜查就奇啦!結果,依一個唔止係少男少女擁戴嘅新偶像,仲要係連師奶阿叔都鍾意嘅靚哥仔,要當街俾人搜身,查身份證,俾Fans影埋相拍埋片添,真係該燴嘞!依個哥仔又唱得又跳得,加上後生俊俏,真係前途無量㗎,如果因為咁而嘖濕咗個名,就唔值得啦!話時話,依個哥哥仔得廿歲,經驗唔夠,敏感度不足,但作為佢嘅監製,應該識諗㗎,點不知,當有記者問佢,會唔會叮囑依個哥哥仔以後唔好咁嘅裝扮出街?你估佢點答?佢話:佢平時都係咁出街㗎喎!喂,大佬呀,成語有話:瓜田李下啦,細佬仔唔識嘢唔怪佢,作為佢嘅監製,大人嚟啦,識得分寸啦,咁唔容易捧到個偶像出嚟,係咪好應該珍惜佢羽毛,好好教育佢呢?希望監製係表裡不一,為咗要「型」先至咁答啦,如果唔係,呀哥哥仔咁様落去,再賴嘢就未必好似今次咁好彩喇!

資深媒體人

瑋公子





You may also like...