政是政非：酒吧限聚漏洞　害苦守法東主

疫症之下，香港人無哂消遣，俾防疫社交限聚令，搞到好鬼腌悶！最近，連續廿幾日無不明源頭個案，當局又好似鬆咗！市民近日對於限聚令都已經習慣咗，不過，防疫嘅嘢做多總好過做少，況且，唔知個病毒會變種到點，大家一旦放鬆，再次社區爆發，香港肯定玩完！限聚令的確打擊市面生意，但又必須要做，如果大家跟住法例做，同甘共苦心甘命抵，但係偏偏有人就唔守規矩，仲當執法機關無到，咁就唔可以容忍喇！

好似酒吧業就係嘞，根據當局最新的酒吧限聚安排：所有員工同埋顧客，一定要接種至少一劑疫苗，而所有顧客必須使用「安心出行」。營業只能至凌晨兩點，每枱最多兩人，場所容納人數為上限的50%。先唔講個規定係咪過嚴，公共衛生要顧及大圍福利，無可能個個都滿意，只要大家跟住規矩做，開門做生意各師各法，有人生意好無得妒忌，有人拍烏蠅係佢唔夠運，大家認命，永無投訴。之但係，有人規矩守到足，樣樣執到正，就日日俾客黑面投訴，跟住索性唔幫趁！而有人偷雞犯法，任啲客為所欲為，就客似雲來生意興隆！最㷫就係冇人去管冇人去理，搞到守規矩嗰啲人好唔憤氣！

你有張良計，我有過牆梯。非法酒吧密密開已經離譜嘞，點知仲有班本來攞正牌開酒吧嘅友仔，費事俾個限聚令阻手阻腳，索性門都唔開扮停業，實情就係暗中做熟客生意；佢哋既然唔係正常營業，自然就唔理所有規矩啦，啲客無拘無束玩得開心，於是生意密密做，揾到盤滿鉢滿！反而「忠忠直直，終須乞食！」依足規矩做嗰啲酒吧，就門堪羅雀，嗌哂救命！你話幾咁唔公平吖！可能大家會問，喂，依種情況連公子你都知，無理由執法單位唔知㗎喎？係呀，執法人員咁多線眼，梗唔會唔知啦！但係正所謂：道高一尺魔高一丈，除非執法人員吓吓放蛇捉到應，否則佢哋聞風先遁，阿Sir未到，已經散走哂啲客！大家都明白，執法人手唔係咁多，唔可以成日玩依啲捉迷藏遊戲，但如果對依啲無視法紀份子隻眼開隻眼閉，變相就係傷害咗守法嘅人！其實，執法部門依把尺真係要度準啲呀，如果唔係，引起嘅反效果，真係唔講得笑㗎！

依場疫症搞咗兩年，病毒變種又再變，真唔知會搞到幾時！全城防疫，隔離措施在所難免，酒吧生意的確難做，但係難歸難，價值觀唔可以變，做咩嘢都要有條底線，一定唔可以過界！正所謂，人在做天在看，做衰嘢嘅人總會有報應嘅，若然未報，只不過係時辰未到啫！

資深媒體人

瑋公子