政是政非 ﹕有錢派有冇私隠都冇所謂

人心就係好難捉摸，一個好似振振有詞嘅原則，隨時可以因為利之所在而改變！原來今日的我可以隨時打倒昨日的我，有時真係幾鬼諷刺嘅！講緊乜？咪就係講話近排人人都不離嘅話題，登記接收財爺派錢囉！

嗱，開始登記首日，就過百萬人搶住上網辦理，搞到個網站都塞哂車，到而家短短幾日，已經有幾百萬人登記咗咯。喂，其實上網登記都要填唔少個人資料㗎，身分證號碼啦、電話號碼、銀行戶口號碼啦，都係個人私隱嘛，哈，點解啲人又唔怕嘅？防疫咁大件事，只不過下載個應用程式App，用電話掃一掃咁簡單啫，啲人就話侵犯私隱呀，又怕俾人知道行蹤呀，抗拒唔肯裝，寧願鬼畫符填紙仔。不過，而家攞消費券要填咁鬼多嘢，反而冇聲出，仲好鬼有耐性網上排隊添！

原來如此，依個世界只要有著數，就乜嘢都唔係問題㗎喇，啲人話驚依樣，驚嗰樣嘅理由，嘻嘻，有錢收就乜嘢問題都冇哂啦！所以話，中國人嘅俗語真係好絕核，「有錢可以使得鬼推磨」真係一啲都冇錯。係嘞，有人會反駁問，喂，公子，攞5000蚊消費券嘅登記程式只係要全組號碼後尾4個之嘛，唔容易泄漏私隱掛？

冇錯，我都係咁諗，其實有關當局喺設計嘅時候，已經有依個考慮，所以要求申請人只需要提供四個冧把，但係以嗰啲連下載「安心出行」都擔心嘅某些人士邏輯，而家科技咁先進，將資料配對整合，都有機會泄漏私隱喎！奇就奇在，今次登記派消費券，有咗5000蚊依個著數，佢哋又即刻唔係咁講嘞，吹咩！仲有呀，為咗全民防疫，政府唔收錢幫市民打針，都係為大家好，只要大家配合，個個打哂兩針，等到全民免疫，咁咪通關有望，大家盡快回復正常生活啦！點知又有一啲人，諸多藉口話冇誘因令佢哋打針，所以唔打喎！大佬呀，你打針免疫係保你自已條命，已經最大誘因啦，你唔打針，有可能染疫㗎，本來佢，自找死，可以唔理佢，但佢更可能成為隱形携帶病毒者，喺全城播毒，咁就大鑊嘞！依種人簡直自私到極。點知，而家一話打針有得抽樓，抽黃金，抽奬金，短短兩星期，打針人數就衝破400萬，仲後勁凌厲添，你話係咪離哂大譜吖！

利之所在，個個想攞著數係人之常情，唔會有人怪嘅！問題係唔好將個龍門任意搬，當其他人係儍嘅睇唔到！其實，其他人唔出聲，只係唔會同佢哋一般見識啫！

資深媒體人

瑋公子