政是政非 ﹕有钱派有冇私隠都冇所谓

人心就系好难捉摸，一个好似振振有词嘅原则，随时可以因为利之所在而改变！原来今日的我可以随时打倒昨日的我，有时真系几鬼讽刺嘅！讲紧乜？咪就系讲话近排人人都不离嘅话题，登记接收财爷派钱囉！

嗱，开始登记首日，就过百万人抢住上网办理，搞到个网站都塞哂车，到而家短短几日，已经有几百万人登记咗咯。喂，其实上网登记都要填唔少个人资料㗎，身分证号码啦、电话号码、银行户口号码啦，都系个人私隐嘛，哈，点解啲人又唔怕嘅？防疫咁大件事，只不过下载个应用程式App，用电话扫一扫咁简单啫，啲人就话侵犯私隐呀，又怕俾人知道行踪呀，抗拒唔肯装，宁愿鬼画符填纸仔。不过，而家攞消费券要填咁鬼多嘢，反而冇声出，仲好鬼有耐性网上排队添！

原来如此，依个世界只要有着数，就乜嘢都唔系问题㗎喇，啲人话惊依样，惊𠮶样嘅理由，嘻嘻，有钱收就乜嘢问题都冇哂啦！所以话，中国人嘅俗语真系好绝核，“有钱可以使得鬼推磨”真系一啲都冇错。系嘞，有人会反驳问，喂，公子，攞5000蚊消费券嘅登记程式只系要全组号码后尾4个之嘛，唔容易泄漏私隐挂？

冇错，我都系咁谂，其实有关当局喺设计嘅时候，已经有依个考虑，所以要求申请人只需要提供四个冧把，但系以𠮶啲连下载“安心出行”都担心嘅某些人士逻辑，而家科技咁先进，将资料配对整合，都有机会泄漏私隐㖞！奇就奇在，今次登记派消费券，有咗5000蚊依个着数，佢哋又即刻唔系咁讲嘞，吹咩！仲有呀，为咗全民防疫，政府唔收钱帮市民打针，都系为大家好，只要大家配合，个个打哂两针，等到全民免疫，咁咪通关有望，大家尽快回复正常生活啦！点知又有一啲人，诸多借口话冇诱因令佢哋打针，所以唔打㖞！大佬呀，你打针免疫系保你自已条命，已经最大诱因啦，你唔打针，有可能染疫㗎，本来佢，自找死，可以唔理佢，但佢更可能成为隐形携带病毒者，喺全城播毒，咁就大镬嘞！依种人简直自私到极。点知，而家一话打针有得抽楼，抽黄金，抽奖金，短短两星期，打针人数就冲破400万，仲后劲凌厉添，你话系咪离哂大谱吖！

利之所在，个个想攞着数系人之常情，唔会有人怪嘅！问题系唔好将个龙门任意搬，当其他人系儍嘅睇唔到！其实，其他人唔出声，只系唔会同佢哋一般见识啫！

资深媒体人

玮公子