政是政非 ﹕「把關者們」值得捧場

好耐，應該係唔短嘅時間冇咁專心坐喺電視機前面睇電視劇，但尋晚居然一睇就睇咗成粒鐘。喂，你哋可能好質疑咁問：「有冇老點呀，今時今日邊有咁好睇嘅電視節目呀？」係嘅，本來就係，但尋晚的確有驚喜，而且好肯定咁話俾大家知，你只要認認真真去做一件事，始終會有人欣賞嘅！

係囉，咪就係講尋晚喺電視首播嘅電視劇「把關者們」囉！依套劇以海關人員的工作為背景，透過劇中主角同埋劇情，描述海關工作範疇，組織架構，以及人員為社會默默耕耘所造出嘅貢獻。公子可以好大膽咁講，一般市民對海關嘅認識相當膚淺，仲有唔少人成日將海關同入境處撈埋一堆，以為佢哋係同一部隊！其實，今時今日嘅海關所做嘅嘢同我哋生活息息相關，佢哋亦都同樣係一支保障市民權益維持社會治安嘅優秀部隊。

電視劇以往好喜歡用警察故作為題材，觀眾會比較熟悉警察嘅編制同工作性質。當然啦，如果冇警方提供資料同配合，電視劇係冇可能拍得咁真實。今次海關全面配合電視台，就拍制咗一部原汁原味嘅海關電視劇嘞。尋晚第一集，我哋可以見到海關大樓嘅內外全貌（就連乜嘢部門喺邊層樓辦公都清楚描述），充滿實感。劇中人物主角嘅部門、職級以及人員嘅工作性質亦都好技巧咁透過劇情介紹俾觀眾知道，相當吸引！第一集嘅主線先集中喺情報及調查部轄下嘅版權及商標調查科同埋海關毒品調查科，仲有貿易管制處嘅消費者保障科依幾個部門。但據知，隨住劇情發展，海關轄下更多部門將會曝光，包括：人力資源；邊境港口；稅務及策略支援等。吓，乜原來海關轄下咁多部門咩？老實講，我哋依啲媒體人都知唔哂，更何況係一般市民吖！依部劇對公子嘅吸引力唔止劇情，仲有長知識，温故而知新添！

執法機關服務市民，根本就唔應該有神秘感，除咗一啲情報因工作需要而保持機密之外，所有工作都應該俾市民認知，透明度愈高，認受性愈高，彼此之間距離愈近，就唔容易有誤解啦！海關今次支持拍依部電視劇，真係值得一讚！而電視劇注入此類新元素，亦使題材多樣化，有更多更大發揮，「把關者們」值得捧場！

資深媒體人

瑋公子