政是政非 ﹕“把关者们”值得捧场

好耐，应该系唔短嘅时间冇咁专心坐喺电视机前面睇电视剧，但寻晚居然一睇就睇咗成粒钟。喂，你哋可能好质疑咁问：“有冇老点呀，今时今日边有咁好睇嘅电视节目呀？”系嘅，本来就系，但寻晚的确有惊喜，而且好肯定咁话俾大家知，你只要认认真真去做一件事，始终会有人欣赏嘅！

系囉，咪就系讲寻晚喺电视首播嘅电视剧“把关者们”囉！依套剧以海关人员的工作为背景，透过剧中主角同埋剧情，描述海关工作范畴，组织架构，以及人员为社会默默耕耘所造出嘅贡献。公子可以好大胆咁讲，一般市民对海关嘅认识相当肤浅，仲有唔少人成日将海关同入境处捞埋一堆，以为佢哋系同一部队！其实，今时今日嘅海关所做嘅嘢同我哋生活息息相关，佢哋亦都同样系一支保障市民权益维持社会治安嘅优秀部队。

电视剧以往好喜欢用警察故作为题材，观众会比较熟悉警察嘅编制同工作性质。当然啦，如果冇警方提供资料同配合，电视剧系冇可能拍得咁真实。今次海关全面配合电视台，就拍制咗一部原汁原味嘅海关电视剧嘞。寻晚第一集，我哋可以见到海关大楼嘅内外全貌（就连乜嘢部门喺边层楼办公都清楚描述），充满实感。剧中人物主角嘅部门、职级以及人员嘅工作性质亦都好技巧咁透过剧情介绍俾观众知道，相当吸引！第一集嘅主线先集中喺情报及调查部辖下嘅版权及商标调查科同埋海关毒品调查科，仲有贸易管制处嘅消费者保障科依几个部门。但据知，随住剧情发展，海关辖下更多部门将会曝光，包括：人力资源；边境港口；税务及策略支援等。吓，乜原来海关辖下咁多部门咩？老实讲，我哋依啲媒体人都知唔哂，更何况系一般市民吖！依部剧对公子嘅吸引力唔止剧情，仲有长知识，温故而知新添！

执法机关服务市民，根本就唔应该有神秘感，除咗一啲情报因工作需要而保持机密之外，所有工作都应该俾市民认知，透明度愈高，认受性愈高，彼此之间距离愈近，就唔容易有误解啦！海关今次支持拍依部电视剧，真系值得一赞！而电视剧注入此类新元素，亦使题材多样化，有更多更大发挥，“把关者们”值得捧场！

资深媒体人

玮公子