媒体就真的可以无的放矢吗？

做咗咁多年人，今时今日先知道原来公务员系应该无朋友、无节日、无人情味嘅！中秋节送礼俾朋友，正常过正常喇，但经有心人刻意夸大，连正常社交都变成官商勾结。我指嘅系有某啲专门搏出位嘅传媒，继早前接二连三抹黑纪律部队之后，又有新搞作，今次老屈入境处人员收受利益。纵使有关人员作出回应，解释左送礼物嘅系老友，又无公事往来，啱哂规矩，该媒体依然自说自话，指鹿为马，真系慌死天下太平。

其实呢单野四个字讲哂，误交损友。唔系话两位入境处人员识错人，错就错在佢哋老友系恒大做野。恒大系内地企业，加上呢排又当黑，唔系衰呢样，就衰𠮶样，形象同股价都插哂水，认真生人勿近！所以呢单野咪俾人发大嚟写囉，如果换转送嘢嘅系间深黄企业，你估结果又会点？

人类系群体动物嚟嘅，正常社交、节日礼仪呢啲唔使教喇。点知有班人好似无受过教育、未社会化咁，见到人大时大节送礼俾朋友就哗哗叫。仲要人地讲到明系无公事来往嘅朋友，咁又何来利益输送呀大佬？申请签证都算公事来往？咁全香港人都同入境处啲职员有公事来往㖞，话哂你同我都有身份证、有出世纸，咁仲唔算同人哋啲职员有公事来往？哈哈，傻的吗？估唔到我哋咁先进嘅社会竟然有人认为所有入境处职员应该断六亲，真好笑。

听人哋报导话个果篮好靓好正，标价成三千银㖞。不过又有报导话二千几蚊，咁究竟几银架？其实疫情搞到经济麻麻，行街买野成日都见有优惠，大时大节更加唔使讲喇，所以边有人要俾原价买呢啲送礼嘢架？算喇，人哋无礼貌少送礼又点会知呀，见到其他人送贺礼仲好似细路哥发现新大陆咁添。

最最最好笑系讲到送个果篮就可以推倒成个入境处咁，人哋部门成立左六十年，样样都有板有眼，有政策、有机制、有程序，唔系同你熟就乜都得，系乜都要跟足程序先得。你估好似某啲媒体咁，对人不对事，专追住纪律部队嚟咬咩。入境处一直都尽心尽力服务我哋，佢哋嘅水准同质素都系有目共睹嘅，无理由因为有心人炒作下呢两个果篮仔，就令我哋怀疑呢个咁专业正直嘅部门下话。其实我地都知道媒体有政治立场，亦知道媒体可以合理怀疑，但媒体就真的可以无的放矢吗？我地生于呢个假新闻满天飞的年代，真系要时刻保持清醒，认清事实，唔好俾人挑拨分化，否则就会正中呢班反中乱港分子嘅下怀喇。

资深媒体人

隷四权