政是政非 ﹕ “寒战”疫症，人间送暖

香港当前大事只有一件，就系全民上下一心合力抗疫，势要将疫魔Omicron 打败，尽快回复正常生活。的而且确，依几年嘅香港人，真系未好过；占中，黑暴，然后系疫症！五波疫情，香港只能应付到较轻微嘅第一、二同埋第四波。严重嘅第三波同埋今次嘅第五波，好在有强大后盾嘅祖国撑住，如果唔系，香港一早就唔掂！

依个第五波Omicron ，早就知佢传播力强劲，估唔到佢可以搞到一日成万人染疫；香港一直自以为好劲嘅医疗系统话冧就冧，医院爆棚，病床放到出户外，最攞命系碰啱寒流袭港，更可怜系中咗病毒嘅病人未及治理，就要抵受刺骨寒风，简直系双重受难，苦不堪言！正所谓“寒天饮雪水 点滴在心头”，呢一敞，香港应该可以话系自日本仔侵占3年零8个月以嚟，最折堕嘅一次咯！

香港依几日，系入冬以嚟最冻嘅天气，加埋落雨就系湿加冻，都咪话唔恶顶！好彩，喺习大大一声令下，加埋中记骆主任嘅呼吁，香港有实力嘅商贾二话不说，纷纷出钱出力。有人就率先捐出一百支户外暖灯，火速就送去俾医院户外病人，排队等候检测嘅市民，同埋围封检测区域工作人员，等佢哋唔驶挨更抵冷，“寒战”疫症，真系贴心！嗱，咪以为依批保暖灯，佢送咗出去就算呀，户外暖灯需要按时补充燃料嘅，所以需要动用大批人手，喺唔同时间去全港九几十个户外暖灯所在点补充燃料，保证能够感“雪中送暖”！

嗱，Omicron 依场疫战虽然难打，好在祖国嘅专家同埋支援队依几日已经抵达，方舱医院亦正在兴建中，香港有咁强大后盾撑住，唔少好似上面𠮶位有心人咁嘅商贾亦纷纷用唔同方式提供支援，我哋好有信心，只要香港市民同政府一条心，依场仗一定会打赢！

资深媒体人 玮公子