网约车发牌考起政府　期待九龙城再现繁华　文：玮公子

【昭传媒】报导日期： 2026 年 6 月 8 日

眨吓眼4年，原来小弟上次喺依度同大家吹水，不知不觉就4年。电视剧有句流行对白“人生有几多个10年？”其实，何止10年，4年其实已经好长。当年暂时搁笔，系因为𠮶几年，经歴过社会运动、疫情、经济萧条！自己失去咗动力，所以一Hea就不知不觉4年喇！

喺依一段唔算长又唔算短嘅日子，见到嘅系不死精神嘅香港人咬实牙关咁样熬过嚟！日子难过始终日日过，实在令人钦佩！由于地缘政治因素，香港难以独善其身，好在政府当局励精国治，在国家强大支持下轻舟屡过万重山，实在庆幸。

如今全球经济都在樽颈，中东战云密布，各国为保利益尔虞我诈，香港未来发展仍存在极大变量，作为香港人，也希望出一分力量，为香港打气，以正面乐观态度鼓励大家一起砥砺前行，闯出新天。

嗱，网约车发牌最近成为一个社会热门话题，究竟当局第一批发牌应该要几多？始终系争论，的士业嘅立场梗系愈少愈好啦，但系作为网约车司机，就一定希望愈多愈好。咁，点先至取得平衡，顺得哥情阿嫂又满意呢？就真系要靠当局智慧嘞。咪睇少依件事呀，搞得好固然人人拍掌，但如果搞唔掂，都会几麻烦！

端午节又到嘞，又系食糭时候，记得早两年买糭，就会去九龙城街市，𠮶度有几档出品一流，料靓味美，远远就闻到糭香。今年再去，街市旁边那一条街已经十室九空物是人非，一片冷清！其实九龙城得天独厚，机场搬走之后，并未失去光芒，美食汇集，以及小曼谷好快又打响名堂，但系依“一舖重建计划”，几条街都已收购，好多出名的舖头食肆都搬走咗。对一个曾经喺九龙城生活咗几十年嘅我而言，真系好唏嘘！无法啦，城市系要进步，只好抱住送旧迎新嘅心态，等待可见重建之后嘅九龙城，再现繁华啦！