政是政非 ﹕阿爺出手 招招中要害

依幾日，北方頻頻透過香港媒體爆料，話人大常委會開會研究，針對香港嘅政制將會大動手術，嗰班靠住食人肉饅頭上位，但又唔做嘢白出糧嘅「獨派」區議員，唔單止可能被DQ，而2022年特首選舉，117個區議員更加可能會被踼出局冇得做選委。消息仲話，為要立法會重回正軌，嗰5個超級區議席都會取消埋。睇嚟，阿爺今次呢舖真係大刀闊斧，唔係講玩喇！

有人就問，DQ咗啲議員空缺，咁唔係又要補選囉，依家疫情咁嚴重，點搞呀？嗱，阿爺做嘢梗係諗埋後着㗎啦，消息話，空缺一於由特區政府委任地區人士填補空缺，而依啲被委任嘅人，當然係以熟悉地區事務者為優先考慮對象啦！不過，有人又問嘞，喂，依啲被委任嘅人，冇民意基礎喎，點得呀？喂，大家唔好唔記得今年依一屆區選有唔少服務咗區議會好多年嘅議員，只差些微票數落選，佢哋有哂民意授權，夠哂資格被委任啦！重返議會之後，佢哋不但駕輕就熟，仲一定會更加落力為地區做實事添！

有人又問嘞，117個區議員不列為特首選委，咁個選委會規模咪愈玩愈縮？咁又唔係喎，阿爺早已經諗埋喇，目前大約有200個港區政協委員，佢哋以往要互選51名代表進入特首選委會，而家就唔駛互選嘞，全體自動成為選委咪掂過碌蔗囉！咁，區議員嘅角色就更加清楚嘞，咪好似而家嗰班咁不務正業又自我膨脹，一於專心做好服務地區嘅嘢就得嘞！

口痕友就話，如果上述嚟自北方消息屬實，香港嘅民主係咪倒退呢？咁就見仁見智喇，事關俾你香港自己去搞又搞出個大頭佛，仲煩到阿爺添，而家要阿爺出手，梗係招招中要害啦！

資深媒體人

瑋公子