政是政非﹕玩政治定係俾政治玩

政治依樣嘢，其實同毒品差唔多，一般人唔會輕易觸碰，但一旦沾咗落去，會愈玩愈上癮，到咗後來不能自拔，分分鐘命都冇埋。睇番本中史書，有關例子比比皆是。奈何，即便如此，仍然有人樂此不疲！

嗱，美國總統特朗普就係一個現實嘅例子啦。依個商界狂人，幾年前貪得意踏入政圈，諗住參選總統搞下局，誰不知竟然獲選總統，從此開始咗佢不一樣嘅人生！咪以為做老闆過癮，原來做總統嘅過癮程度不知高百倍千倍，睇吓佢上任唔夠4年，翻手即雲，覆手是雨嘅表演，成個地球幾十個國家跟住佢轉，簡直可以話係為所欲為！以前佢做衰老闆，最多俾行家唱、俾伙記鬧啫，而家做衰政客，要係俾全世界嘅人鬧！喂，係咪好似道友吸咗毒咁，自己頂癮，但生人勿近呢？

其實喺香港，都有唔少人版，一班讀飽書嘅律師，有專業唔做，走去搞政治，以為嘩眾取寵博取掌聲，就可以無所不能。須知政治依家野一山還有一山高，卒之佢哋遭逢當頭重擊，回頭太難了！今日俾警方拘捕嘅肥佬黎嘞，佢本來係製衣廠老闆，改行做傳媒，利用媒體嘅力量玩政治玩到出哂位，過癮喇啩，結果又唔係引火自焚！冇錯，人係政治嘅動物，做乜都離唔開政治，但冇人要你主動去擁抱佢，糾纏佢嘛，玩政治？分分鐘俾政治玩呀，總之避得就避啦！

資深媒體人

瑋公子