政是政非 ﹕林太放棄虛銜有何不可

細個讀書時，聽到「劍橋」依兩個字好興奮，英國劍橋大學係所有莘莘學子夢寐以求進入嘅學府，可惜自己讀書唔夠叻，考唔到入去，只能夠望門興嘆啦！所以，真係好羨慕能夠入到劍橋讀書嘅高材生。

最近劍橋大學又成為熱門話題，特首林太幾日前主動宣佈放棄咗劍橋大學沃爾學院頒發俾佢榮譽院士名銜。個理由係：學院方面將學術政治化，認為佢執行港版國安法，係偏離學術自由同言論表達自由原則。林太覺得依種指控毫無道理，為咗捍衞尊嚴，乾脆主動放棄！

香港政界有啲口水佬，就牙痕痕話，林太一家四口，丈夫同兩個仔都係劍橋大學畢業，林太又被政府保送劍橋進修過，真係不折不扣嘅「劍橋人」，林太咁做，有啲可惜！其實，依種學院名銜，都係一啲錦上添花嘅嘢，係因為林太喺香港嘅特首，所以先俾呢個名銜佢啫，對林太嚟講，咁嘅虛銜，有冇都冇乜所謂啦！相反，本來有個香港特首係「校友」，係學院威水啫，而家咪失威囉！老實講，個學院咁搞法，對劍橋大學喺國際聲譽嚟講，未必係好事。

中美政治角力如火如荼，香港成為磨心，今日係大是大非嘅抉擇，林太作為香港特首，點都要有所取捨，大家有睇到啦，更大嘅犠牲佢都在所不惜，又何況係放棄一個虛銜呢！

資深媒體人

瑋公子