政是政非 ﹕林太放弃虚衔有何不可

细个读书时，听到“剑桥”依两个字好兴奋，英国剑桥大学系所有莘莘学子梦寐以求进入嘅学府，可惜自己读书唔够叻，考唔到入去，只能够望门兴叹啦！所以，真系好羡慕能够入到剑桥读书嘅高材生。

最近剑桥大学又成为热门话题，特首林太几日前主动宣布放弃咗剑桥大学沃尔学院颁发俾佢荣誉院士名衔。个理由系：学院方面将学术政治化，认为佢执行港版国安法，系偏离学术自由同言论表达自由原则。林太觉得依种指控毫无道理，为咗捍衞尊严，干脆主动放弃！

香港政界有啲口水佬，就牙痕痕话，林太一家四口，丈夫同两个仔都系剑桥大学毕业，林太又被政府保送剑桥进修过，真系不折不扣嘅“剑桥人”，林太咁做，有啲可惜！其实，依种学院名衔，都系一啲锦上添花嘅嘢，系因为林太喺香港嘅特首，所以先俾呢个名衔佢啫，对林太嚟讲，咁嘅虚衔，有冇都冇乜所谓啦！相反，本来有个香港特首系“校友”，系学院威水啫，而家咪失威囉！老实讲，个学院咁搞法，对剑桥大学喺国际声誉嚟讲，未必系好事。

中美政治角力如火如荼，香港成为磨心，今日系大是大非嘅抉择，林太作为香港特首，点都要有所取舍，大家有睇到啦，更大嘅犠牲佢都在所不惜，又何况系放弃一个虚衔呢！

资深媒体人

玮公子