政是政非﹕ 冇料大状凭乜閙资深法官

今时今日嘅香港，充斥住嘅都系未够班唯我独尊嘅自大狂。个个信口开河，不分尊卑，又冇廉耻，将成个香港嘅水准都拉低哂！系呀，唔系就系讲紧早排好似缩头乌龟咁潜咗水，而家见冇乜事又蒲头出嚟废噏，以为攞住个大状资格就好巴闭𠮶个垃圾议员囉，喂，大佬，佢唔系好钟意学英国佬咩，点解人哋法律界传统落嚟𠮶套论资排辈都唔尊重下呀，佢有乜资格批评辈份高佢十段嘅前辈呀？咁搞法，英国佬都唔帮佢啦！

连一场漂亮官司都冇打过，喺大状榜上企大后排嘅冇料之辈，居然大放厥词批评资歴深厚，喺法律界备受敬重嘅终审法院前常任法官！查实喺法律界里面，佢论辈份、论资历，拍马都追唔上𠮶位法官；至于讲法律常识同埋经验就唔好比嘞（真系唔知佢究竟仲识唔识打官司），就讲江湖地位嘞，佢就已经冇得挥啦！香港法律界自英国佬年代起，向来有规有矩，推祟尊师重道，就算意见不合，都会扮吓嘢尊重对方意见，特别对前辈，总会退让三分。估唔到嚟到依个年代，一班后起之“秀”，英国佬嘅虚有其表，例如煲呔袋巾、三件头就摆哂上身学到足，但系啲内涵呀气质呢，就统统学唔到！喂，班友仔咁鬼祟拜英国佬，点解佢哋对住仇家仲可以笑笑口，握手兼拍膊头嘅虚伪技俩，又徧徧学唔到呢？而家𠮶位法官前辈喺度发表佢个人意见啫，又冇得罪佢，更加唔算得上仇家啦，喂，如果佢认为法官嘅意见唔啱听，就用更好法律意见驳佢囉！佢唔系好专业，好叻嘅咩？应该好多理据㗎，点解唔提出呢？而家发烂渣閙人，仲近乎人身攻击添，过火咗啦，失礼死人！

其实，法律界新“秀”嘅道德品行真系大不如前！好似另一个同系法律界嘅议员，佢做大状之前跟嘅师父因政治原则辞去议员职务，全力支持佢竞选补任，卒之成功咗啦，谁不知贵为议员之后，因同个师父政见唔同，就反面唔认人，对师父当日教导提携之恩抛诸脑后，形同陌路！

唉，我哋细佬哥时，小学又好，中学又好，谢师宴上送俾老师嘅牌匾，好钟意有依一句：“一日为师，终身为父”，不过，到咗今时今日，依句说话已经不再合用！莫说话老师前辈，就算系年纪大啲，都俾人闹“废老”！最可悲系而家好似文革咁，好多唔想俾人閙“废老”嘅人就急不及待向啲后生仔示好，帮手去闹自己同龄或比自己年纪老嘅人“废老”！老，今日原来系一个罪，何其荒谬！不过，提一提大家，时间过得好快㗎，冇几耐你哋都会变废老，好快受罪喇！

资深媒体人

玮公子