政是政非 ﹕人生苦短 要珍惜自己

上周末突然收到噩耗，平時fit到漏油，一個星期起碼跑3日，每次跑10公里嘅多年老友阿盧，喺屋企睇睇下電視就走咗！唉，真係難以形容內心嘅不捨同悲痛！與阿盧相識不覺20多年喇，當年我喺美國返嚟，重投傳媒圈，真係人生路不熟，好彩認識咗阿盧，佢真誠、熱心、樂於助人，有佢扶一把，條路好行好多。我哋從此兄弟相稱，互相幫忙，唔駛多講一句。

人稱盧Sir嘅阿盧，活躍傳媒界，亦縱橫於政商界，佢頭腦靈活，充滿幹勁，而且計仔多多，富冒險精神。佢熱衷於提携後輩，經常身先士卒，常掛咀邊一句說話：「世上好多嘅冇可能，最後都成為事實，如果自己能夠將冇可能嘅任務完成，就係顕現自己能力嘅最好證明！」冇錯，就憑依句話，佢鼓勵咗唔少新人，造就咗唔少人才，佢亦自己去實踐，創造出一番成就。我認識嘅阿盧永不言倦，亦永不言休，生前仍滿肚子計劃，為公益，為傳媒界嘅未來發展躊躇滿志。可惜，餘願末了，62歲正值壯年就猝然而去，令人惋歎，懷念！

一個活力充沛運動型嘅人突然之間就走了，令世人充滿問號！阿盧係咁，台灣著名藝人小鬼亦幾乎係相同遭遇！唔做運動就話會肥，肥就會多病啦，點知常做運動嘅人，原來亦一様難逃厄運！睇怕真係天意弄人喇！現代人生活緊張，工作以及精神壓力之大實在難以估計，要抒緩依啲壓力其實唔容易，因為佢積積埋埋究竟有幾多，你自己根本唔知道。所以，做人一定先要睇得開，做事雖要認真但千祈唔好勉強，得就盡做，如果唔得就一於話之佢喇！

冇錯，講就易嘞，人人都好明白添，弊在做唔到呢！不過，有個老友教咗個方法，大家可以試吓，真係好work㗎。就係每逢遇上解決唔到嘅事，先放低佢，唔好鑚牛角尖死去諗點解決方法，揾吓其他嘅做，或者去揾娛樂，又或者好似我另一個老友咁：「努力去揾好嘢食」，潛意識就會釋放好多壓力。嗱，唔到你唔信㗎，嗰件解決唔到嘅事無啦啦會搞掂，又或者你福至心靈突然就會想到點去解決。係呀，依個方法我試過好得㗎，而且萬事萬靈添！好多人都以為嗰啲惡疾，例如癌症、心臟病可怕，其實，精神壓力先至喺Final boss ，因為一切惡疾之源都係因壓力影響情緒，導致體內失調所引發。所以，都係嗰句啦，要活得自在，凡事睇開啲，人生苦短，及時行樂呀！

資深媒體人

瑋公子