政是政非 ﹕ 司法大山缺口暴現 唔推都冧

中國人出仕為官，為民請命，自古以來，都係士大夫最祟高嘅理想。中國嘅官既管行政，亦管司法，集權於一身，威到盡。大家唔好忘記呀，九品芝麻官都係官嚟㗎，佢雖然階級低，但比起一般草民，仍然擁有比人多啲嘅權力，用起上嚟，分分鐘可以玩死你㗎，你又吹佢唔脹噃！所以，我哋細細個就聽到老人家教：「民不與官爭，官字有兩個口，點都唔夠佢鬥㗎」，所以「生不入官門，死不入地獄」，先至安落！

好嘞，入正題嘞，任何制度都係由人嚟訂嘅。司法獨立就係一把尚方寶劍，擁有遇神殺神嘅威力，無人可以挑戰，保障法官不受任何干擾同影響，而作出公正嘅判决。不過，用依把尚方寶劍嘅人必須要有一個先決條件，就係唔可以有主觀立場，要絶對嘅中立同埋公正。咁多年嚟，香港人深信司法界可以恪守依個誠信同埋道德，所以認同司法獨立係香港嘅核心價值。

回歸前，香港大部分嘅法官係鬼佬，佢哋嘅文化背景、生活圈子同大部分嘅香港人好唔同，佢哋審案可以只睇證據供詞，而好客觀咁依據法律判決。不過，時代在變，格局亦在變，回歸之後，由香港人當家作主，司法界嘅結構亦逐漸改變，鬼佬法官亦都由主流變咗「少數族裔」！

嗱，咁問題就出現喇！生於斯長於斯嘅香港人對社會認知比鬼佬深入透徹，受教育成長過程中，潛意識已經種落主觀嘅諗法，加上政治上腦，都唔容易保證佢哋能夠好專業咁客觀審案！係，我同意，唔同案件有唔同嘅背景、人物同埋發生過程，就算告同一條罪，都未必有相同嘅判決；法官判刑嘅輕重亦都需要根據犯人嘅年紀、動機同埋法律的約束作為量刑考慮，無論判得輕抑或重，都係法官嘅專業判決。不過，最近個別法官嘅舉措反常，判詞主觀、判決偏頗、幾乎係身兼兩職，化身為被告辯護律師，為被告開脫。依啲事件搞到司法界風風雨雨，有人開始質疑法官嘅專業，挑戰司法界權威！

真係唔係講笑㗎，依個係一個危險信號，亦可能係摧毀司法獨立嘅缺口！咁多年嚟，香港社會都喺度優化中，廉政公署未成立之前，香港貪污搞到世界聞名，老廉成立之後，貪污差不多絕迹。香港警方隊甚至成為國際上數一數二嘅廉潔紀律部隊。司法界依座大山向來冇王管，因為過往佢哋大部分都係恪守專業，嚴謹自律，獲得信任。但係今時今日有啲官毫不珍惜先輩努力建立嘅基石，政治上腦背叛專業，擺到明就係「以權謀私」，真係令人惋惜！計我話，解鈴還須繫鈴人，司法界位高權重嘅高官千祈咪懶懶閒，以為冇乜事呀，依個缺口唔去理佢就會擴大，到時搞到山崩，依座大山唔駛人推佢都自已冧！

資深媒體人

瑋公子