政是政非 ﹕ 司法大山缺口暴现 唔推都冧

中国人出仕为官，为民请命，自古以来，都系士大夫最祟高嘅理想。中国嘅官既管行政，亦管司法，集权于一身，威到尽。大家唔好忘记呀，九品芝麻官都系官嚟㗎，佢虽然阶级低，但比起一般草民，仍然拥有比人多啲嘅权力，用起上嚟，分分钟可以玩死你㗎，你又吹佢唔胀噃！所以，我哋细细个就听到老人家教：“民不与官争，官字有两个口，点都唔够佢斗㗎”，所以“生不入官门，死不入地狱”，先至安落！

好嘞，入正题嘞，任何制度都系由人嚟订嘅。司法独立就系一把尚方宝剑，拥有遇神杀神嘅威力，无人可以挑战，保障法官不受任何干扰同影响，而作出公正嘅判决。不过，用依把尚方宝剑嘅人必须要有一个先决条件，就系唔可以有主观立场，要绝对嘅中立同埋公正。咁多年嚟，香港人深信司法界可以恪守依个诚信同埋道德，所以认同司法独立系香港嘅核心价值。

回归前，香港大部分嘅法官系鬼佬，佢哋嘅文化背景、生活圈子同大部分嘅香港人好唔同，佢哋审案可以只睇证据供词，而好客观咁依据法律判决。不过，时代在变，格局亦在变，回归之后，由香港人当家作主，司法界嘅结构亦逐渐改变，鬼佬法官亦都由主流变咗“少数族裔”！

嗱，咁问题就出现喇！生于斯长于斯嘅香港人对社会认知比鬼佬深入透彻，受教育成长过程中，潜意识已经种落主观嘅谂法，加上政治上脑，都唔容易保证佢哋能够好专业咁客观审案！系，我同意，唔同案件有唔同嘅背景、人物同埋发生过程，就算告同一条罪，都未必有相同嘅判决；法官判刑嘅轻重亦都需要根据犯人嘅年纪、动机同埋法律的约束作为量刑考虑，无论判得轻抑或重，都系法官嘅专业判决。不过，最近个别法官嘅举措反常，判词主观、判决偏颇、几乎系身兼两职，化身为被告辩护律师，为被告开脱。依啲事件搞到司法界风风雨雨，有人开始质疑法官嘅专业，挑战司法界权威！

真系唔系讲笑㗎，依个系一个危险信号，亦可能系摧毁司法独立嘅缺口！咁多年嚟，香港社会都喺度优化中，廉政公署未成立之前，香港贪污搞到世界闻名，老廉成立之后，贪污差不多绝迹。香港警方队甚至成为国际上数一数二嘅廉洁纪律部队。司法界依座大山向来冇王管，因为过往佢哋大部分都系恪守专业，严谨自律，获得信任。但系今时今日有啲官毫不珍惜先辈努力建立嘅基石，政治上脑背叛专业，摆到明就系“以权谋私”，真系令人惋惜！计我话，解铃还须系铃人，司法界位高权重嘅高官千祈咪懒懒闲，以为冇乜事呀，依个缺口唔去理佢就会扩大，到时搞到山崩，依座大山唔驶人推佢都自已冧！

资深媒体人

玮公子