政是政非 ﹕有機制何須嗌餐死打官司

今時今日做官真唔容易，尤其喺香港依個弱勢政府做官，簡直係如履薄冰！咪以為有滿腔熱誠做好份工就冇事，唔搞掂個制度，最終就會無辜辜咁孭鑊！嗱，最近失德教師嗰單嘢，就係最好例子啦！罪魁禍首係嗰啲失德教師，而監管不力嘅學校亦應該受到譴責。但係教育局都釘咗教師個牌啦，就因為未公布「釘牌」教師個名而成為眾矢之的，真係陰功！

香港現行嘅教育制度，雖然經過多次改革，藍本始終都係由英國佬留落嚟。不過英國佬喺殖民地做嘢向來都好陰濕，訂立制度故意做啲又偏徧做漏啲。嗱，喺處理失德教師嘅投訴上，香港就從來冇一套完善機制，所以種下咗今日嘅禍根！不過，喺英國本土，其實早早就有一套行之有效嘅制度，而且程序仲好公開添！係呀，英國設有法定機構Teaching Regulation Agency（TRA）負責認證教師資格，以及管理教師的註冊事宜。TRA同時負責處理關於教師嘅投訴，先初部評估，如果認為案件屬實，就會排期展開專業操守聆訊。聆訊資料同埋通告都會公開，並且放到網上俾公眾閱覽，所有人都可以輕易查到，透明度相當高。

TRA甚至有權發出臨時禁制令，阻止受查教師繼續擔任教學工作，直至聆訊完結為止。而TRA對「釘牌」決定嘅指引中就提到，衡量教師失德行為嘅嚴重性時，其中一個重要的考量係行為對學生嘅思想同行為所造成嘅影響。指引又詳細列出不同違反操守嘅情況，例如教師散播政治或宗教極端主義，或者故意讓學生接觸有關行動就會被判定為不適合再當教師，隨時可被取消教師資格。

作育英才係教師嘅天職，學生哥白紙一張，如果喺教育過程被誤導，被污染，將一生受害！嗱，有人仲會問，失德教師名單係咪一定要公開呢？依個問題，大家嗌亦冇謂，英國佬訂依個制度出來自然有其必要性啦，至於佢哋當年點解唔喺香港訂一套咁嘅制度，就真係天曉得嘞！其實，唔止英國呀，話埋俾你哋聽啦，美國佛羅里達州同澳洲昆士蘭都有類似制度㗎！

話說回頭嘞，香港如果都有一套咁嘅機制，就唔駛前特首梁生咁勞嘈，日日咬住教育局官員唔放，要佢公開失德教師名單啦！一切按照機制做，就天下太平啦！計我話，而家冇計㗎嘞，最終都係要交俾法庭去處理，法官話公開名單就公開囉！正所謂講多無謂，如今重中之重，就係快啲訂個機制嚟「招呼」嗰班失德教師。唔好拖喇，唔識做唔緊要㗎，照抄啦，將英國佬嗰套整舊搬過嚟唔係就掂囉！

資深媒體人

瑋公子